ՀՀ իշխող կոալիցիայի խորհրդարանական ՀՀԿ, «Օրինաց երկիր» և «Բարգավաճ Հայաստան» խմբակցությունների առաջնորդները հանդես են եկել հայ-թուրքական հարաբերությունների կարգավորման՝ իշխանությունների քաղաքականությանը սատարող հայտարարությամբ:
Ինչպես հայտնում է «Նովոստի-Արմենիա» գործակալության թղթակիցը, հայտարարության մեջ ընդգծվում է, որ նախաստորագրված արձանագրությունները արտացոլում են առանց նախապայմանների հարաբերությունները կարգավորելու Հայաստանի դիրքորոշումը:
«Մեր ժողովրդի իմաստությունը թելադրում է Թուրքիայի հետ հարաբերությունների նորմալացման հարցում վճռականություն դրսևորելու անհրաժեշտությունը»,- ասվում է հայտարարության մեջ:
«Մենք ողջունում ենք այս քաղաքականությունն ու կոչ անում ՀՀ բոլոր քաղաքացիներին, քաղաքական ու հասարակական կուսակցություններին, ինչպես նաև սփյուռքին ամբողջ աշխարհից անհրաժեշտ պայմաններ ստեղծել այս գործընթացն ավարտին հասցնելու համար»,- նշվում է փաստաթղթում:
Օգոստոսի 31-ին Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդակցություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ:
Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը:
Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները:
Անկարան արդեն հայտարարել է, որ Հայաստանի և Թուրքիայի միջև դիվանագիտական հարաբերությունների հաստատման համաձայանգիրը ստորագրվելու է հոկտեմբերի 10-ին:-0-
