Կովկաս - կասպիական տարածաշրջանում Էներգետիկայի անվտանգության հեռանկարները կքննարկվեն Երևանում
Երկուշաբթի Երևանում կանցկացվի «Էներգետիկայի անվտանգության հեռանկարները Կովկաս - կասպիական տարածաշրջանում» կլոր սեղան, «Նովոստի-Արմենիա» գործակալությանը հայտնեցին Կովկասի ինստիտուտից:
Կլոր սեղանը կազմակերպում է Կովկասի ինստիտուտը՝ Հայաստանում ԱՄՆ դեսպանատան հետ համատեղ:
Միջոցառման ընթացքում զեկույցով հանդես կգա եվրոպական, ռուսական և եվրասիական հետազոտությունների ինստիտուտի գիտաշխատող, Կարլտոն համալսարանի դոկտոր Ռոբերտ Քատլերը:
Դոկտոր Քատլերը մեծ փորձ ունի էներգետիկայի անվտանգության և աշխարհաքաղաքականության ոլորտում և վերջին տասը տարիների ընթացքում խորհրդատվական ծառայություններ է մատուցել մի շարք միջազգային էներգետիկ ընկերությունների, գիտական կենտրոնների և կառավարությունների:
Զեկույցից հետո տեղի կունենա քննարկում: Կլոր սեղանին կմասնակցեն գիտնականներ, հասարակական գործիչներ, լրագրողներ, միջազգային կազմակերպությունների և դիվանագիտական առաքելության ներկայացուցիչներ:
Կլոր սեղանը կազմակերպվում է Կովկասի ինստիտուտի և Հարավային Կովկասում «Հենրիխ Բյոլլ» հիմնադրամի հետ համատեղ: Ծրագրի շրջանակներում անցկացվելու են մի շարք փորձագիտական սեմինարներ և հրապարակային քննարկումներ ընդհանուր ծրագրի սահմաններում, որոնց նպատակն է հրավիրել Հայաստանի հասարակության ուշադրությունը որոշ տարածաշրջանային և միջազգային արդի զարգացումներին:-0-