Հայ սեյսմոլոգները կրկնակի երկրաշարժ են գրանցել Ինդոնեզիայում

Հայ սեյսմոլոգները կրկնակի երկրաշարժ են գրանցել Ինդոնեզիայում, «Նովոստի-Արմենիա» գործակալությանը տեղեկացրել են ՀՀ սեյսմիկ պաշտպանության ազգային ծառայությունից:

Գործակալության զրուցակցի խոսքերով, 6,8 մագնիտուդով երկրաշարժը տեղի է ունեցել հինգշաբթի տեղական ժամանակով ժամը 06:52-ին Ինդոնեզիայի տարածքում՝ Սունաիպենուհ քաղաքից 59 կմ դեպի հարավ- արևելք: Երկրաշարժի ուժգնությունն էպիկենտրոնում կազմել է 9 բալ:

Ինչպես հաղորդում է «ՌԻԱ Նովոստին», մի քանի օր շարունակ տարերային աղետը մոլեգնում է Խաղաղ և Հնդկական օվկիանոսի կղզիներում: Այս անգամ աղետի զոհ դարձավ Սումատրա ինդոնեզական կղզին, որի ափամերձ տարածքում վերջին օրվա ընթացքում տեղի է ունեցել երկու հզոր երկրաշարժ՝ 7,6 և 7,0 մագնիտուդով: Երկու երկրաշարժների հետևանքով կան բազմաթիվ զոհեր և ավերածություններ:

Վերջին տվյալների համաձայն, միայն Սումատրայի Պադանգ ափամերձ քաղաքում աղետի զոհ է դարձել ավելի քան 200 մարդ: Ինչպես հայտարարել է Ինդոնեզիայի առողջապահության նախարարության ճգնաժամային կենտրոնի ղեկավար Ռուստամ Պակայան, հազարավոր մարդիկ են մնացել ավերակների տակ: Իշխանությունները մտավախություն ունեն, որ զոհերի թիվը կարող է հասնել մի քանի հազարի:-0-