Գոյության մեկ տարվանից հետո կարելի է փաստել, որ Հայաստանի սփյուռքի նախարարությունը հաջողությամբ լուծում է իր ռազմավարական խնդիրները, չորեքշաբթի մամուլի ասուլիսում հայտարարեց Հայաստանի սփյուռքի նախարար Հրանուշ Հակոբյանը։
«Նախարարության ստեղծման պահին մենք մեր առջև երեք կարևորագույն խնդիր ենք դրել՝ հայկական պետության օժանդակություն հայ ազգային ինքնության պահպանման գործին, սփյուռքի ներուժի բացահայտում և արդյունավետ օգտագործում, հայրենադարձության գործընթացի խթանում։ Տվյալ պահին մենք լուծում ենք այդ խնդիրները»,- ասաց նախարարը։
Նրա խոսքերով՝ հայ ազգային ինքնության պահպանման խնդրի լուծումը նախարարւոթյունն իրականացնում է՝ հիմնվելով չորս կարևոր տարրերի վրա՝ հայոց լեզու, հայկական մշակույթ, ընտանիք և եկեղեցի։
Հակոբյանն ընդգծեց, որ նախարարության կարևորագույն ձեռքբերումը գոյության առաջին տարում կարելի է համարել սփյուռքի վստահությունն այս կառույցի նկատմամբ։
«Մենք որոշ դժվարություններ ունենք, քանի որ նախարարության շատ աշխատակիցներ սփյուռքագետներ չեն, և այս տարին կարելի է համարել փորձերի և սխալների տարի»,- ասաց նախարարը։
Ըստ նրա՝ սփյուռքի նախարարության գոյությունը նշանակում է, որ Հայաստանի բազմաթիվ ծրագրերի համահայկական նշանակություն է տրվում։
Նախարարը նշեց, որ նախարարության կայացման ճանապարհին ուսումնասիրվել և կիրառվել է մեծ սփյուռք ունեցող երկրների՝ Իսրայելի և Հունաստանի փորձը։
«Նախարարության մեկ տարվա գոյության ընթացքում մենք իրականացրել ենք այս տարվա գրեթե բոլոր ծրագրերը, իսկ որոշ ծրագրեր իրականացման փուլում են»,- ասաց Հակոբյանը։ -0-
