Հայ-թուրքական հարաբերությունների նորմալացումը դրականորեն կանդրադառնա ռուս-հայ-թուրքական հարաբերությունների վրա. փորձագետ
Հայ-թուրքական հարաբերությունների նորմալացումը կարող է միայն դրականորեն անդրադառնալ ռուս-հայկական և ռուս-թուրքական հարաբերությունների վրա, կարծում է հայ վերլուծաբան Տիգրան Մկրտչյանը:
«Հաշվի առնելով Հայաստանի տնտեսությունում ռուսական ներկայության զգալի բաժինը և ռուս-թուրքական տնտեսական կապերը, չեմ կարծում, որ հայ-թուրքական մերձեցումը բացասական ազդեցություն կունենա ինչպես ռուս-հայկական, այնպես էլ ռուս-թուրքական հարաբերությունների վրա»,- ասաց Մկրտչյանը «Նովոստի-Արմենիա» գործակալությանը տված հարցազրույցում:
Ըստ նրա՝ Ռուսաստանի ներկայությունը բավականին զգալի է հայ-թուրքական հարաբերությունների նորմալացման գործընթացում, և Ռուսաստանը հետաքրքրություն է դրսևորում դրանց վերջնական կարգավորման հարցում:
Վերլուծաբանը համաձայն չէ այն կարծիքի հետ, որ Ռուսաստանի դիրքերը Կովկասում կթուլանան Հայաստանի և Թուրքիայի հարաբերությունների նորմալացումից հետո:
«Կարծում եմ, որ դա սխալ տեսակետ է: Ռուս-հայկական բարեկամությունն ու միությունը բազմադարյա պատմություն ունի, իսկ ռազմավարական համագործակցությունը կառուցվում է՝ ելնելով անվտանգության նկատառումներից»,- նշեց Մկրտչյանը: -0-
