Հայաստանի արտաքին գործերի նախարարությունը հայ-թուրքական արձանագրությունների մասին կտեղեկացնի պատշաճ ժամկետում։
«Արձանագրությունների հետ կապված բոլոր գործողությունների մասին մենք կհայտարարենք պատշաճ ժամկետներում»,- «Նովոստի-Արմենիա» գործակալությանը հայտնեց հայկական արտգործնախարարության ԶԼՄ-ների հետ կապի բաժնի ղեկավար Տիգրան Բալայանը՝ Թուրքիայի վարչապետ Ռեջեփ Թայիփ Էրդողանի հայտարարությունը մեկնաբանելու խնդրանքին ի պատասխան։
Ինչպես տեղեկացնում է «Ազատություն» ռադիոկայանը՝ հղում անելով թուրքական կառավարության ղեկավարին, Թուրքիայի և Հայաստանի միջև դիվանագիտական հարաբերությունների հաստատման վերաբերյալ համաձայնագիրը կստորագրվի հոկտեմբերի 10-ին, փաստաթղթի տակ ստորագրություն կդնեն երկու երկրի արտգործնախարարները։
Ավելի ուշ համաձայնագրին պետք է հավանություն տան հայկական և թուրքական խորհրդարանները։
Օգոստոսի 31-ին Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդատվություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ»:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։
Հարաբերություններում առաջին տեղաշարժերը նկատվեցին 2008թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Հանդիպման ավարտից հետո Թուրքիայի նախագահը հրավիրել է իր հայ գործընկերոջ Թուրքիա ներկա գտնվելու 2009 թ.- հոկտեմբերի 14-ին կայանալիք երկու երկրների ֆուտբոլի հավաքականների պատասխան խաղին:-0-
