Ռուսաստանն ու ԱՀԿ-ն Հայաստանին «խոզագրիպի» դեմ պատվաստանյութ կտրամադրեն

Ռուսաստանի առողջապահության նախարարությունը և Առողջապահության համաշխարհային կազմակերպությունը ՀՀ առողջապահության նախարարությանը կտրամադրեն А/H1N1 վիրուսի /«խոզագրիպի»/ դեմ պատվաստանյութ, հինգշաբթի լրագրողներին հայտնեց Հայաստանում ԱՀԿ գրիպի համաճարակաբանական վերահսկողության համակարգող, ՀՀ Առողջապահության նախարարության հիգիենիկ և հակահամաճարակաբանական տեսչության գլխավոր մասնագետ Լիանա Թորոսյանը:

Առողջապահության նախարարության տվյալներով, А/H1N1 վիրուսով վարակված մարդիկ Հայաստանում տվյալ պահին չկան:

«ՀՀ առողջապահության նախարարությունը դիմել է ԱՀԿ-ին և Ռուսաստանի համապատասխան գերատեսչությանը, որպեսզի առաջին իսկ հնարավորության դեպքում պատվաստանյութը Հայաստան բերվի ու սկսվի պատվաստման գործընթացը»,- հայտարարեց նա: 

Թորոսյանը հավելեց, որ այժմ Ռուսաստանում ավարտվում են պատվաստանյութի կլինիկական փորձարկումները, և երբ այն հանվի արտադրության, ապա անմիջապես կբերվի Հայաստան:

Նրա խոսքերով, պատվաստանյութը կլինի երկու տեսակի՝ կենդանի և կենդանի թուլացված, և եթե առաջինը կկիրառվի աերոզոլային եղանակով, ապա երկրորդը՝ ներարկման միջոցով:

Թորոսյանը նշեց, որ բնակչության այն խմբերը, որոնք պետք է պատվաստվեն, սահմանված են, և այժմ հստակեցվում է միայն մարդկանց քանակը:

Նրա խոսոքերով, առաջին հերթին կպատվաստվեն առաջին բուժօգնության օղակի ու շտապօգնության աշխատակիցները, հղի և մինչև վեց ամսական երեխաներին խնամող կանայք, ինչպես նաև խրոնիկ հիվանդություն ունեցող մարդիկ:  

«Ելնելով պատվաստանյութի քանակից՝ մենք կավելացնենք մարդկանց քանակակազմը»,- հավելեց նա:

Նա ընդգծեց, որ եթե Ռուսաստանի և ԱՀԿ տրամադրած պատվաստանյութի քանակը չբավարարի պատվաստումներն իրականացնելու համար, ապա իշխանությունները միջոցներ կձեռնարկեն պակասող քանակը լրացնելու համար:

2009թ. սեպտեմբերի 18-ի դրությամբ Առողջապահության համաշխարհային կազմակերպության (www.who.int) կողմից աշխարհում գրիպի Ա H1N1 վիրուսով հարուցված դեպքերի վերաբերյալ տեղեկատվության համաձայն, մարդկանց շրջանում H1N1 վիրուսով հարուցված գրիպի 300 հազար դեպք կա, որոնցից 3000-ը՝  մահվան ելքով:-0-