Լևոն Արոնյանը վաղաժամկետ դարձավ Բիլբաոյի շախմատային մրցաշարի հաղթողը

Լևոն Արոնյանը ժամանակից շուտ հաղթեց Մեծ սաղավարտի շարքի` այս օրերին Բիլբաոյում անցկացվող շախմատային մրցաշարում:  

Ուրբաթ նախավերջին՝ հինգերորդ տուրի շրջանակներում Արոնյանը պարտության մատնեց իսպանացի Ալեքսեյ Շիրովին: Մեկ այլ պարտիայում ռուս Ալեքսանդր Գրիշչուկը և ուկրաինացի Սերգեյ Կարյակինը ոչ-ոքի խաղացին:

Հինգ տուրերի արդյունքում Արոնյանը 12 միավորով վստահ առաջատարի դիրքում է: Երկրորդ տեղում 7 միավորով Գրիշչուկն է, իսկ դա նշանակում է, որ անկախ 6-րդ տուրի արդյունքներից՝ Արոնյանը երաշխավորել է իր հաղթանակը: Երրորդ տեղում է Կարյակինը 6 միավորով, իսկ մրցաշարային աղյուսակը եզրափակում է Շիրովը 2 միավորով:

Շաբաթ 6-րդ տուրի շրջանակներում Կարյակինը կհանդիպի Արոնյանի, իսկ Շիրովը Գրիշչուկի հետ:

Հարկ է նշել, որ հայ գրոսմայստերը Բիլբաո է հասել միայն այն բանի շնորհիվ, որ գերմրցաշարերից մեկի հաղթող, բուլղարացի Վեսելին Տոպալովը հրաժարվել է մասնակցել եզրափակիչ մրցումներին: 

Բիլբաոյի ուղեգրեր են ստացել Մեծ սաղավարտի գերմրցաշարերի հաղթողները, այդ մրցաշարերն են Վեյք-ան-Զեե (Նիդեռլանդներ), Լինարես (Իսպանիա), Նանկին (Չինաստան), Սոֆիա (Բուլղարիա) քաղաքների մրցաշարարը:

Մեծ սաղավարտի մրցաշարերում միավորների հաշվարկը տարբերվում է շախմատում ընդունված ձևից. 3 միավոր հաղթանակի, մեկ միավոր՝ պարտության համար:

Բիլբաոյի երկու շրջանից բաղկացած մրցաշարը կավարտվի սեպտեմբերի 12-ին:-0-