Հայաստանի ԱԳՆ նախկին ղեկավարի՝ պատգամավորական մանդատից հրաժարվելը պայմանավորված է անձնական պատճառներով. «Ժառանգություն» կուսակցություն
«Ժառանգություն» կուսակցության առաջնորդ Րաֆֆի Հովհաննիսյանի հրաժարվելը Հայաստանի Ազգային Ժողովի պատգամավորական մանդատից պայմանավորված է անձնական պատճառներով, չորեքշաբթի մամուլի ասուլիսում հայտարարեց «Ժառանգություն» ընդդիմադիր կուսակցության խորհրդարանական խմբակցության պատգամավոր Ստեփան Սաֆարյանը։
«Ներկայումս, մեր կուսակցության ղեկավար Հովհաննիսյանի խոսքերով, պատգամավորական մանդատից հրաժարվելու դրդապատճառներն անձնական բնույթ են կրում, որոնք կապված են ազգային սկզբունքային կարևորագույն հարցերի, այդ թվում հայ-թուրքական հարաբերություններին առնչվող հարցերի հետ»,- ասաց Սաֆարյանը։
Նրա խոսքերով՝ «Ժառանգություն» կուսակցությունը, սկսած 2008 թվականի մարտյան դեպքերից, փորձել է ընդհանուր երկխոսություն գտնել Հայաստանի բոլոր քաղաքական ուժերի հետ՝ առաջարկելով ստեղծել քաղաքական միասնական պլատֆորմ։
Սաֆարյանը նշեց, որ Երևանի Ավագանու խորհրդի ընտրություններից հետո և հատկապես հայ-թուրքական հարաբերությունների շուրջ վերջին իրադարձություններից հետո «Ժառանգությունը» սկսեց հոռետեսորեն վերաբերել ինչպես իշխանական օղակներին, այնպես էլ ընդդիմադիրներին՝ չտեսնելով դրանցում փոխադարձ համագործակցության լուրջ պատրաստակամություն հանուն ազգային շահերի պաշտպանության։
Քաղաքական գործիչը նշեց, որ այս ամենի ֆոնի ներքո և, մասնավորապես, Հայաստանի իշխանությունների կողմից հայ-թուրքական հարաբերությունների վերաբերյալ հայ ժողովրդի հետ չհամաձայնեցված որոշումների ներքո «Ժառանգություն» կուսակցության առաջնորդը հրաժարվել է պատգամավորական մանդատից։
«Նրա հրաժարականը, սակայն, չի նշանակում, որ նա հեռանում է կուսակցությունից և մեծ քաղաքականությունից։ Հովհաննիսյանը կմնա կուսակցության ղեկավարի պաշտոնում, բայց խորհրդարանից դուրս՝ շարունակելով աշխատել և ծառայել իր ժողովրդին»,- ընդգծեց Սաֆարյանը։
Ակնկալվում է, որ Րաֆֆի Հովհաննիսյանին խորհրդարանում կփոխարինի Մովսես Արիստակեսյանը։
Սաֆարյանն ավելացրեց, որ «Ժառանգություն» կուսակցությունը մտադիր է նաև մասնակցել Հայաստանի 2012 թվականի Ազգային Ժողովի ընտրություններին։ -0-
