Հայաստանի տնտեսության կառուցվածքը չպետք է կախված լինի հայ-թուրքական սահմանի բացումից. փորձագետ
Հայաստանի տնտեսական կառուցվածքը հարկ է ձևավորել այնպիսի ենթադրությունների շուրջ, որոնք կախված չեն հայ-թուրքական սահմանի բացումից, կարծում է «Տնտեսություն և արժեքներ» հետազոտական կենտրոնի նախագահ Մանուկ Հերգնյանը։
«Սահմանների բացման դեպքում Հայաստանի տնտեսական կառուցվածքը կորցնում է իր անկախությունը», - երեքշաբթի ասաց նա «Նովոստի» միջազգային մամուլի կենտրոնում։
Նշելով, որ Հայաստանի և Թուրքիայի հետ սահմանի բացման դեպքում Հայաստանի տնտեսական կառուցվածքը լուրջ փոփոխությունների կենթարկվի, Հերգնյանն ասաց, որ կսկսեն զարգանալ այնպիսի արտադրություններ և բիզնես-ոլորտներ, որոնք ենթադրում են սահմանի բացումը, մուտքը այլ շուկաներ և գնային այլ քաղաքականություն հումքի գծով։
«Միաժամանակ հարկ է նկատի ունենալ, որ հայ-թուրքական սահմանը կարող է կրկին փակվել, և այդ դեպքում մեծ է այն ռիսկը, որ մենք կհայտնվենք մի իրավիճակում, որում հայտնվել ենք արդեն կրկնակի՝ ԽՍՀՄ փլուզումից և համաշխարհային ֆինանսատնտեսական ճգնաժամից հետո»,- պարզաբանեց նա՝ հավելելով, որ այն ժամանակ տնտեսական կառուցվածքը կառուցվում էր մի քանի ենթադրությունների շուրջ, որոնք որոշակի պահին դադարեցին գոյություն ունենալուց։
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Առաջին քայլերը հարաբերություններում արվեցին 2008թ. սեպտեմբերի 6-ին, երբ Թուրքիայի նախագահ Աբդուլա Գյուլն առաջին անգամ ՀՀ նախագահ Սերժ Սարգսյանի հրավերով այցելեց Երևան՝ 2010 թ. աշխարհի առաջնության ընտրական փուլի շրջանակներում երկու երկրների հավաքականների միջև ֆուտբոլային հանդիպումը դիտելու համար։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։:
