ԵՐԵՎԱՆ, 8 սեպտեմբերի. /Նովոստի-Արմենիա/. Հայաստանն այսօր պատրաստ չէ Թուրքիայի հետ սահմանի բացմանը՝ չունենալով թուրքական դիվանագիտության ճնշմանը դիմակայելու բավարար միջոցներ, կարծում է «Միտք» վերլուծական կենտրոնի փորձագետ Էդուարդ Աբրահամյանը։
«Շատ պարզամիտ է այն, որ Թուրքիան կբացի Հայաստանի հետ սահմանը, քանի որ, ունենալով թուրքական դիվանագիտության մասին գերազանց պատկերացումներ, կարող եմ ասել, որ Հայաստանը պատրաստ չէ մրցել նրա հետ սկսված գործընթացում»,- երեքշաբթի մամուլի ասուլիսում հայտնեց Աբրահամյանը։
Ըստ նրա՝ եթե Թուրքիան բացի իր սահմանները Հայաստանի հետ իր պետական շահերին ի հակառակ, ապա որոշ ժամանակ անց անպայման նախապայմաններ կներկայացնի, հատկապես ղարաբաղյան հակամարտության վերաբերյալ՝ միաժամանակ ունենալով ազատ գործելու լայն հնարավորություններ։
Մասնավորապես, փորձագետը համոզմունք հայտնեց, որ Թուրքիայի համար նման լեյտմոտիվ կարող է լինել Հայաստանի կեղծ մեղադրանքը ստորագրված պայմանագրերի (այժմ՝ արձանագրությունների) կատարողականության վերաբերյալ։
Օգոստոսի 31-ին Թուրքիայի և Հայաստանի արտգործանախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ Հայաստանի հետ բանակցություններում, որոնք ընթանում են Շվեյցարիայի միջնորդությամբ, պայմանավորություն է ձեռք բերվել «քաղաքական խորհրդատվություններ» սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ: Քաղաքական խորհրդակցությունները ծրագրվում է ավարտել վեց շաբաթվա ընթացքում, որից հետո կստորագրվեն երկու արձանագրությունները, որոնք կներկայացվեն երկու երկրների խորհրդարանների հաստատմանը:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Առաջին քայլերը հարաբերություններում արվեցին 2008թ. սեպտեմբերի 6-ին, երբ Թուրքիայի նախագահ Աբդուլա Գյուլն առաջին անգամ ՀՀ նախագահ Սերժ Սարգսյանի հրավերով այցելեց Երևան՝ 2010 թ. աշխարհի առաջնության ընտրական փուլի շրջանակներում երկու երկրների հավաքականների միջև ֆուտբոլային հանդիպումը դիտելու համար։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները:--0--
