ԵՐԵՎԱՆ, 8 սեպտեմբերի. /Նովոստի-Արմենիա/. Հայ-թուրքական հարաբերությունների նորմալացումը բխում է Թուրքիայի և Ռուսաստանի աշխարհաքաղաքական շահերից, կարծում է ՀՀԿ խմբակցության անդամ, ՀՀ ԱԺ մարդու իրավունքների պաշտպանության և հասարակական հարցերի մշտական հանձնաժողովի փոխնախագահ Ռաֆիկ Պետրոսյանը:
Ինչպես նա նշեց երեքշաբթի մամուլի ասուլիսի ժամանակ, Վրաստանի պատերազմից հետո այդ երկիրը սկսեց շատ անկայուն համարվել, «այդ պատճառով ավելի հաճախակի են դարձել Nabucco-ին Հայաստանի հնարավոր մասնակցության մասին խոսակցությունները, իսկ դա հնարավոր չէ փակ սահմաններով»:
«Ռուսաստանը հատկապես շահագրգռված է հայ-թուրքական սահմանի բացմամբ, քանի որ այդ դեպքում Ռուսաստանը մուտք կունենա Հայաստան»,- ասաց պատգամավորը:
Խոսելով Թուրքիայի շահերի մասին՝ Պետրոսյանն ընդգծեց, որ Թուրքիային անհրաժեշտ է Եվրոպային ներկայացնել Հայաստանի հետ իր բարիդրացիական հարաբերությունները՝ ԵՄ մտնելու համար:
«Բացի այդ, Հայաստանի հետ սահմանի բացումը նոր շուկա է թուրքական ապրանքի համար»,- հավելեց նա:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Առաջին քայլերը հարաբերություններում արվեցին 2008թ. սեպտեմբերի 6-ին, երբ Թուրքիայի նախագահ Աբդուլա Գյուլն առաջին անգամ ՀՀ նախագահ Սերժ Սարգսյանի հրավերով այցելեց Երևան՝ 2010 թ. աշխարհի առաջնության ընտրական փուլի շրջանակներում երկու երկրների հավաքականների միջև ֆուտբոլային հանդիպումը դիտելու համար։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
Օգոստոսի 31-ին Թուրքիայի և Հայաստանի արտգործանախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ Հայաստանի հետ բանակցություններում, որոնք ընթանում են Շվեյցարիայի միջնորդությամբ, պայմանավորություն է ձեռք բերվել «քաղաքական խորհրդատվություններ» սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ: Քաղաքական խորհրդակցությունները ծրագրվում է ավարտել վեց շաբաթվա ընթացքում, որից հետո կստորագրվեն երկու արձանագրությունները, որոնք կներկայացվեն երկու երկրների խորհրդարանների հաստատմանը:--0--
