Հայաստանը ԱԱՀՈՒ կազմին համապատասխան միավորումներ է տրամադրել. Բորդյուժա

Հայաստանը ՀԱՊԿ Արագ արձագանքման հավաքական ուժերի կազմին ինչպես ռազմական ուղղվածության, այնպես էլ անվտանգության և ներքին գործերի մարմինների ու ԱԻՆ-ից հատուկ նշանակության ուժերի միավորումներ է տրամադրել, ասաց ՀԱՊԿ գլխավոր քարտուղար Նիկոլայ Բորդյուժան։

«Այն միավորումները, որոնք տրամադրվել են Հայաստանից ԱԱՀՈՒ կազմին, գտնվում են մշտական տեղակայման վայրերում և կկիրառվեն այն դեպքում, եթե անհրաժեշտություն լինի գործարկել դրանք կոնկրետ ռազմական խնդիրների կատարման համար»,- հինգշաբթի Մոսկվա-Երևան «ՀԱՊԿ Ինստիտուտ. Հավաքական անվտանգության պայմանագրի կազմակերպության զարգացման նոր գործիք» թեմայով տեսաասուլիսի ընթացքում հայտնեց նա։

Բորդյուժայի խոսքերով, ներկայում մշակվում է և նախապատրաստվում ԱԱՀՈՒ առաջին զորավարժությունների անցկացման մտահղացումը։
 
«Ստորագրված համաձայնության գաղափարով, ԱԱՀՈՒ շրջանակներում մշտապես գործող կառույցներ պետություններում չեն ստեղծվելու»,- ընդգծեց ՀԱՊԿ գլխավոր քարտուղարը։

ԱԱՀՈՒ ստեղծման հիմնական նպատակների թվում են ՀԱՊԿ երկրների անվտանգության ամրապնդումը առկա և հնարավոր սպառնալիքների ֆոնին, ներառյալ ահաբեկչությունը, ծայրահեղականությունն ու թմրանյութերի շրջանառությունը, բնական ու տեխնածին բնույթի արտակարգ իրավիճակների կանխարգելումն ու վերացումը, ինչպես նաև միջազգային խաղաղության ու անվտանգության պահպանման գործում ՀԱՊԿ արդյունավետ մասնակցության ապահովումը:

ՀԱՊԿ անդամներն են՝ Հայաստանը, Բելառուսը, Ղազախստանը, Ղրղզստանը, Ռուսաստանը, Տաջիկստանը և Ուզբեկստանը: Հունիսին տեխնիկական նախագահությունը ՀԱՊԿ-ում Հայաստանից փոխանցվել է Ռուսաստանին: -0-