ԵՐԵՎԱՆ, 26 օգոստոսի. /Նովոստի-Արմենիա/. Հայկական հասարակությունը չի ընդունում «Մադրիդյան սկզբունքները» որպես ղարաբաղյան հակամարտության կարգավորման միջոց, չորեքշաբթի «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ տեղեկացրեց Քաղաքական զարգացումների հետազոտական կենտրոնի նախագահ Վահան Դիլանյանը՝ ներկայացնելով «Արդյո՞ք Մադրիդյան սկզբունքներն ընդունելի են Հայաստանի և ԼՂՀ հանրությունների համար» հարցման արդյունքները:
Մադրիդյան սկզբունքների թվում են, մասնավորապես, հանրաքվեի միջոցով ԼՂՀ ժողովրդի ինքնորոշման իրավունքի իրագործումը, Հայաստանի և Լեռնային Ղարաբաղի միջև ընդհանուր ցամաքային սահմանի առկայության անհրաժեշտությունը, անվտանգության երաշխիքների տրամադրումը։
«Հաշվի առնելով՝ որպես ղարաբաղյան հակամարտության կարգավորման հնարավոր տարբերակ «Մադրիդյան սկզբունքների» արդիականության աճը՝ կենտրոնը ինտերնետ-հարցում է անցկացրել Հայաստանի քաղաքացիների և հայկական սփյուռքի ներկայացուցիչների շրջանում», - լրագրողներին տեղեկացրեց Դիլանյանը:
Նրա խոսքերով, հուլիսի 20-ից օգոստոսի 20-ն անցկացվող հարցմանը 3651-ից շուրջ 2021 մարդ է մասնակցել: Հարցման արդյունքների համաձայն, պարզվել է, որ հարցվածների 1239-ը (61, 30 տոկոս) չեն ընդունում «Մադրիդյան սկզբունքները» որպես հակամարտության կարգավորման միջոց, 492-ը (23,34 տոկոս) «Մադրիդյան սկզբունքները» համարել են ընդունելի, իսկ մնացած 288-ը (14,25 տոկոս) չունեն հստակ դիրքորոշում:
Դիլանյանի խոսքերով, ավելի մեծ ակտիվություն է դրսևորել հարցվածների երկրորդ խումբը, որը ներառում է 25-ից 40 տարեկան փորձագետներ, գիտաշխատողներ և դասավանդողներ:
Հարցվածների առաջին խմբում են ներառվել 18-30 տարեկան երիտասարդները, ովքեր իրենց զգալիորեն պասիվ են դրսևորել:
«Հարցման արդյունքներով, հարցվածների ընդհանուր թվից 1900-ը պատկանում էր երկրորդ խմբին, իսկ հարցվածների ոչ զգալի մասը՝ 121 հոգի, պատկանում են առաջին խմբին», - ասաց Դիլանյանը:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրեցին նրան, որ վերացավ հսկողությունը ոչ միայն Լեռնային Ղարաբաղում, այլև հարակից յոթ շրջանում:
1994թ. մայիսի 12-ին զինադադարի վերաբերյալ կնքված եռակողմ համաձայնագրից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ մահացավ շուրջ 25-30 հազար մարդ, և մոտ մեկ միլիոնն ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվայանից ի վեր հակամարտության խաղաղ կարգավորման ուղղությամբ բանակցություներ են տարվում ԵԱՀԿ Մինսկի խմբի շրջանակներում, որոնց համանախագահներն են ԱՄՆ-ն, Ռուսաստանը և Ֆրանսիան:-0-
