Հայ զինվորականները կներգրավվեն Աֆղանստանի Անվտանգության աջակցության միջազգային ուժերին. դիվանագետ

ԵՐԵՎԱՆ, 24 օգոստոսի. /Նովոստի-Արմենիա/. Հայ զինվորականները կներգրավվեն Աֆղանստանի տարածքում գործող Անվտանգության աջակցության միջազգային ուժերի առաքելության մեջ, հայտնեց ՆԱՏՕ-ում Հայաստանի առաքելության ղեկավար Սամվել Մկրտչյանը ՆԱՏՕ-ի նորանշանակ գլխավոր քարտուղար Անդերս Ֆոգ Ռասմուսենի հետ հանդիպման ժամանակ:

«Դեսպանն ընդգծել է, որ հայկական կողմը կարևորում է մասնակցությունը ՆԱՏՕ-ի կողմից իրականացվող խաղաղապահ գործողություններին. առաջիկայում հայ զինվորականները կներգրավվեն նաև Աֆղանստանի Անվտանգության աջակցության միջազգային ուժերին»,- երկուշաբթի «Նովոստի-Արմենիա» գործակալությանը հայտնեցին արտաքին քաղաքական գերատեսչության մամուլի ծառայությունից:

Դեսպան Մկորտչյանը նշել է նաև, որ Հայաստանը հաստատակամ է զարգացնել գործընկերային հարաբերությունները Դաշինքի հետ, և Անհատական գործընկերության գործողությունների ծրագիրը կծառայեցվի այդ նպատակին:

Պաշտոնի ստանձնման կապակցությամբ Սամվել Մկրտչյանը ՆԱՏՕ-ի գլխավոր քարտուղարին է փոխանցել Հայաստանի նախագահի, արտգործնախարարի և պաշտպանության նախարարի շնորհավորանքները:

Իր հերթին ՆԱՏՕ-ի Գլխավոր քարտուղարը դրական է գնահատել Հայաստանի հետ համագործակցությունը` գործող ձևաչափերի շրջանակներում: Անդերս Ֆոգ Ռասմուսենը կարևորել է Դաշինքի կողմից ղեկավարվող գործողություններին Հայաստանի մասնակցությունը:

Ռասմուսենն ընդգծել է նաև, որ Հարավային Կովկասի երկրների հետ համագործակցությունը շարունակելու է:-0-