Երեք շախմատիստներ պահպանել են առաջատար դիրքերը Հայաստանում անցկացվող ՖԻԴԵ-ի Գրան-պրի մրցաշարում

ԵՐԵՎԱՆ, 21 օգոստոսի. /Նովոստի-Արմենիա/. Երեք գրոսմայստերներ՝ հունգարացի Պետեր Լեկոն, ուկրաինացի Վասիլի Իվանչուկն ու ուզբեկ Ռուստամ Կասիմջանովը, Ջերմուկում անցկացվող ՖԻԴԵ-ի Գրան-պրի մրցաշարի տասը փուլից հետո պահպանել են առաջատար դիրքերը, հաղորդում է «ՌԻԱ Նովոստին»:

Հինգշաբթի Լեկոն խաղի 65-րդ քայլին ոչ-ոքի է ավարտել հայ շախմատիստ Վլադիմիր Հակոբյանի հետ հանդիպումը, իսկ Իվանչուկը խաղի 82-րդ րոպեին կրկին ոչ-ոքի է խաղացել իր հայրենակից Սերգեյ Կարյակինի հետ, Կասիմջանովը խաղի 73-րդ քայլին ևս ոչ-ոքի է ավարտել ամերիկացի շախմատիստ Գատա Կամսկու հետ հանդիպումը:

Տասներորդ փուլը բավականին արդյունավետ էր, ընդ որում երկու հանդիպումներում հաջողությունը տոնում էին ռուսները: Եվգենի Ալեքսեևը պարտության է մատնել ուկրաինացի շախմատիստ Պավել Էլյանովին, իսկ Էռնեստո Ինարկիևը հաղթանակ է տարել ֆրանսիացի շախմատիստ Էթյեն Բակրոյի նկատմամբ:

Հայ գրոսմայստեր Լևոն Արոնյանը հաղթանակ է տարել Դմիտրի Յակովենկոյի նկատմամբ, իսկ իսրայելցի շախմատիստ Բորիս Գելֆանդը պարտության է մատնել բուլղարացի շախմատիստ Իվան Չեպարինովին:

Գրան-պրիի մրցաշարի ավարտից երեք փուլ առաջ գրանցվել են հետևյալ ցուցանիշները՝ Իվանչուկ, Լեկո, Կասիմջանով՝ հնարավոր 10 միավորից 6,5-ական միավոր, Արոնյան, Ալեքսեև՝ 6-ական միավոր, Կարյակին, Գելֆանդ՝ 5,5-ական միավոր, Էլյանով՝ 5 միավոր, Բակրո՝ 4,5 միավոր, Յակովենկո, Հակոբյան, Կամսկի՝ 4-ական միավոր, Չեպարինով, Ինարկիև՝ 3-ական միավոր:

Ջերմուկում անցկացվող շախմատի մրցաշարը կավարտվի օգոստոսի 24-ին:-0-