Հայաստանը 13,2 հազար տոննա ծիրան է արտահանել

ԵՐԵՎԱՆ, 12 օգոստոսի. /Նովոստի-Արմենիա/. Հայաստանը 13,2 հազար տոննա ծիրան է արտահանել, «Նովոստի-Արմենիա» գործակալությանը տեղեկացրեց ՀՀ գյուղատնտեսության փոխնախարար Սամվել Գալստյանը:

«Արտահանման ծավալներն, իսկապես, մեզ ուրախացնում են: Դա աննախադեպ ցուցանիշ է, և եթե լուծվի «Վերին Լարս» անցակետի խնդիրը, ապա համոզված եմ, որ արտահանման ծավալներն ավելի մեծ կլինեին», - ասաց նա:

Գալստյանը տեղեկացրեց, որ օպերատիվ տվյալների համաձայն` ծիրանի համախառն բերքը կազմում է 82-83 հազար տոննա` նախորդ տարվա 80 հազար տոննայի համեմատ, որից տարեվերջին իրականացրած արտահանումը կազմել է 1600 տոննա:

Հիմնականում ծիրանն արտահանվում է Ռուսաստան, Վրաստան, Ուկրաինա, Բելառուս, ԱՄՆ: Հայկական ծիրանն արտահանվում է նաև եվրոպական շուկաներ, օրինակ` Բելգիա:

«Այսօր բարձր տարածքներում ծառերի վրա դեռ կարելի է տեսնել այդ հյութալի պտուղը և նվազագույնը 15 օր այն կլինի շուկայում», - ասաց նա:

Միաժամանակ փոխնախարարը նշեց, որ նախորդ տարվա համեմատ ծիրանի գնման ծավալները նվազել են:

«Նախորդ տարի գնվել էր 6 746 տոննա, այս տարի` 3600 տոննա ծիրան: Նախորդ տարվա գնումների և այս տարվա ծավալների միջև տարբերությունը կազմում է երեք հազար տոննա, սակայն 2009 թ.-ի արտահանման ծավալների ավելացումն ու գնումների ծավալների փաստացի կրճատումը տեղի է ունեցել արտահանման ավելացման հաշվին, իսկ ծիրանի նկատմամբ ներքին պահանջարկը պահպանվել է», - պարզաբանեց նա:

Միաժամանակ Գալստյանը նշեց, որ ոչ բոլոր գնորդներն են վճարել ծիրանի մատակարարման համար: Ծիրանի միջին գինը կազմում է 1 կգ-ի դիմաց 45-50 դրամ  (0,14 ցենտ):-0-