ՀՀ արտգործնախարարությունն ավելորդ է համարում մեկնաբանել «Հայկական ժամանակ» ընդդիմադիր հայկական թերթի հրապարակումն այն մասին, թե Մոսկվայում Հայաստանի և Ադրբեջանի նախագահների հուլիսին կայացած հանդիպման ժամանակ ղարաբաղյան հարցի վերաբերյալ փաստաթուղթ է ստորագրվել:
«Այդ թերթում արտաքին քաղաքականության վերաբերյալ հրապարակվող նյութերը այնքան անհեթեթ են, որ կարիք չունեն ոչ միայն հերքման, այլև մեկնաբանության», - ասել է ՀՀ ԱԳՆ մամուլի և տեղեկատվության վարչության լրատվամիջոցների հետ կապի բաժնի վարիչ Տիգրան Բալայանը:
Հուլիսի 17-18-ն Մոսկվայում կայացել են Ադրբեջանի և Հայաստանի նախագահներ Իլհամ Ալիևի և Սերժ Սարգսյանի հանդիպումները, որոնք վերաբերում էին ղարաբաղյան հակամարտության կարգավորման հարցին: Միջնորդներն այդ հանդիպումները կառուցողական են գնահատել: Նախագահների հանդիպումը վերջին տասներեք ամսվա ընթացքում արդեն վեցերորդն էր:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
