ՀՀ մարդու իրավունքների պաշտպանի ինստիտուտն ակտիվացնում է բանակում իրավախախտումների դեմ պայքարի մոնիտորինգային գործունեությունը

ԵՐԵՎԱՆ, 28 հուլիսի. /Նովոստի-Արմենիա/. ՀՀ մարդու իրավունքների պաշտպանի ինստիտուտն ակտիվացնում է մոնիտորինգային գործունեությունը՝ բանակում իրավախախտումների դեմ պայքարի նպատակով, «Նովոստի-Արմենիա» գործակալությանը տված հարցազրույցում ասաց ՀՀ մարդու իրավունքների պաշտպան Արմեն Հարությունյանը:

«Ոչ կանոնակարգային հարաբերությունները բանակում մեծ խնդիր է, և, ցավոք, մեր բանակում այդ խնդրի հետ կապված իրավիճակը բավարար չէ: Այս երևույթի դեմ պայքարի նպատակով Մարդու իրավունքների պաշտպանի ինստիտուտն ակտիվացնում է երկրի մարզերում մոնիտորինգային գործունեությունը», - ասաց Հարությունյանը:

Սակայն Մարդու իրավունքների պաշտպանի կարծիքով, հաշվի առնելով խնդրի հրատապությունը՝ անհրաժեշտ է ՀՀ պաշտպանության նախարարության մասնակցությունը և ներգրավվածությունը գործընթացին, «քանի որ խնդիրը, իսկապես, մեծ է, և մենք բոլորս պետք է շահագրգռված լինենք արմատախիլ անել այդ երևույթը»:

«Մենք շատ բողոքներ ենք ստանում բանակում իրավախախտումների վերաբերյալ, և այս ոլորտում, նախորդ տարվա համեմատ, իրավիճակը չի փոխվել», - ասաց Օմբուդսմենը:

Խոսելով ռազմական օմբուդսմենի ինստիտուտի ստեղծման մասին՝ Հարությունյանն ասաց, որ ՀՀ Սահմանադրությունը նախատեսում է միայն մեկ օմբուդսմենի առկայությունը, սակայն հաշվի առնելով հարցի հրատապությունը՝ Օմբուդսմենի ինստիտուտի շրջանակներում հիմնադրվել է ռազմական հարցերով խորհրդականի հատուկ հաստիք, որը, ըստ էության, ամբողջությամբ կատարում է ռազմական օմբուդսմենի գործառույթները:-0-