Հայ մարզիկները երկու մեդալ են նվաճել Եվրոպայի պատանեկան օլիմպիական փառատոն 2009-ում
Հայ մարզիկները երկու մեդալ են նվաճել Ֆինլանդիայի Տամպերե քաղաքում անցկացվող Եվրոպայի պատանեկան օլիմպիական փառատոնում, ասվում է Հայաստանի սպորտի և երիտասարդության հարցերի նախարարության կայքում տեղադրած հաղորդագրությունում։
Բրոնզե մեդալ մինչև 73 կգ քաշային կարգում նվաճեց չարենցավանցի ձյուդոիստ Մհեր Թավաքալյանը։ Իսկ վանաձորցի ձյուդոիստ Գարիկ Հարությունյանը արծաթ նվաճեց մինչև 50 կգ քաշային կարգում։
Եվրոպայի պատանեկան օլիմպիական փառատոն 2009-ում Հայաստանը ներկայացնող 20 մարզիկները հանդես են գալիս վեց մարզաձևերում՝ ձյուդո, թեթև աթլետիկա, հեծանվասպորտ, թենիս, լող և սպորտային մարմնամարզություն։
Եվրոպայի պատանեկան օլիմպիական փառատոները (ԵՊՕՓ) համալիր մրցումներ են, որոնք անցկացվում են Միջազգային օլիմպիական կոմիտեի (ՄՕԿ) հովանու ներքո «Եվրոպայի օլիմպիական կոմիտեներ» (ԵՕԿ) ասոցիացիայի կողմից բոլոր եվրոպական երկրների մասնակցությամբ։ Մրցումներն անցկացվում են յուրաքանչյուր կենտ տարի ըստ ձմեռային և ամառային օլիմպիական մարզաձևերի և կանոնակարգվում է 2003 թվականի դեկտեմբերի 13-ին ԵՕԿ Գլխավոր ասամբլեայի կողմից հավանության արժանացած ԵՊՕՓ Խարտիայի կողմից։ Մասնակիցների տարիքը, նկատի ունենալով մարզաձևը, կազմում է 13-17 տարեկան։ -0-
