ԵՐԵՎԱՆ, 24 հուլիսի. /Նովոստի-Արմենիա/. Ղարաբաղյան հակամարտության կարգավորման՝ Մադրիդյան հրապարակված բոլոր վեց սկզբունքներն անընդունելի են ինչպես Հայաստանի, այնպես էլ Ադրբեջանի համար, ուրբաթ մամուլի ասուլիսի ժամանակ լրագրողներին հայտարարեց ՀՀ ԱԳ նախկին նախարար, ընդդիմադիր Հայ ազգային կոնգրեսի անդամ Ալեքսանդր Արզումանյանը:
«Հայաստանի համար անընդունելի են կողմերի մշակած մադրիդյան սկզբունքները, քանի որ դրանցից ոչ մեկում ներկայացված չեն ղարաբաղյան հակամարտությանն ուղղված հստակ գործողությունները, այլ միայն հռչակագրորեն նշվում են ուղղությունները: Նույն պատճառով այդ սկզբունքներն անընդունելի են ադրբեջանական կողմի համար», -ասաց Արզումանյանը:
Նա նշեց, որ Հայ ազգային կոնգրեսն անընդունելի է համարում Մադրիդյան սկզբունքները և հասնելու է նրան, որ դրանք չիրագործվեն:
Նրա խոսքերով՝ այսօր ոչ միայն ԼՂՀ-ն, այլև և Հայաստանը, և Ադրբեջանը, ըստ էության, չեն մասնակցում բանակցություններին, որոնք կազմակերպում և փաստացի վարում են միջնորդ-երկրները՝ ի դեմս Ռուսաստանի, ԱՄՆ-ի և Ֆրանսիայի, որոնք այդ հարցի շուրջ բացառապես անձնական շահեր են հետապնդում:
Միաժամանակ քաղաքագետը նշեց, որ ղարաբաղյան հակամարտության գոտում պատերազմը կարող է ամեն պահ սկսվել՝ կախված առաջին անձանց շուրթերից հակամարտության կարգավորման փաստաթղթի վերաբերյալ դժգոհության հայտարարություններից:
«Հայտարարությունները, որոնք երբեմն կարելի է լսել Բրայզայի և գերտերությունների բարձրագույն այլ ներկայացուցիչների շուրթերից այն մասին, որ պատերազմ չի լինի, ինքնին ազդանշան է, որ մեծ է ամեն պահ ռազմական գործողությունների վերսկսման սպառնալիքը», - ընդգծեց դիվանագետը:
Հակամարտության կարգավորման մադրիդյան սկզբունքները, մասնավորապես, նախատեսում են ազատ կամարտահայտության միջոցով Ղարաբաղի կարգավիճակի սահմանումը, Լեռնային Ղարաբաղի և Հայաստանի միջև ցամաքային կապի ապահովումը, անվտանգության երաշխիքների տրամադրումը, ինչպես նաև վերահսկվող տարածքներից զորքի դուրսբերումը:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
