Հայաստան-ԵՄ համագործակցության ընդլայնումը կլինի ԵՄ-ում Շվեդիայի նախագահության գերակայություններից. Շվեդիայի դեսպան

Հայաստանի և ԵՄ միջև համագործակցության ընդլայնումը Արևելյան գործընկերության շրջանակներում ԵՄ-ում Շվեդիայի նախագահության գերակայություններից կլինի, ասաց Հարավային Կովկասի երկրներում Շվեդիայի Արտակարգ և լիազոր դեսպան Հանս Գունար Ադենը ԵՄ-ում հուլիսի 1-ից Շվեդիայի նախագահությանը նվիրված քննարկումների ժամանակ։

Քննարկումը կազմակերպվել է «Եվրոպական շարժումը Հայաստանում» հասարակական կազմակերպության կողմից։

«Շվեդիան Արևելյան գործընկերության նախաձեռնողներից է եղել։ Որպես նախագահող երկիր՝ մենք կանենք մեզանից կախված հնարավորն այդ ծրագրի զարգացման համար, այդ թվում՝ Հայաստանի հետ»,- ասաց Ադենը։

Նրա խոսքերով՝ հատուկ շեշտադրում կարվի Արևելյան գործընկերության յուրաքանչյուր անդամ-պետության հետ երկկողմանի հարաբերությունների ընդլայնմանը։

Դեսպանը նշեց, որ ԵՄ-ում Շվեդիայի նախագահության կարևորագույն գերակայություններից կլինի դիմակայությունը համաշխարհային ֆինանսատնտեսական ճգնաժամին և գլոբալ բնապահպանական խնդիրներին։

ԵՄ «Արևելյան գործընկերություն» ծրագիրն ընդունվել է Լեհաստանի և Շվեդիայի նախաձեռնությամբ և հաստատվել է ԵՄ 27 երկրների կողմից 2008 թ.-ի դեկտեմբերին Բրյուսելում կայացած գագաթնաժողովի ժամանակ։

«Արևելյան գործընկերություն» փաթեթը նախատեսում է Հայաստանի, Ադրբեջանի, Բելառուսի, Վրաստանի, Մոլդովայի և Ուկրաինայի հետ ԵՄ համագործակցության զարգացում, քաղաքական ինտեգրման աստիճանի առավել զգալի բարձրացում։--0--