Ամենայն Հայոց Գարեգին Երկրորդ Կաթողիկոսը շաբաթ օրը Մայր Աթոռ Սուրբ Էջմիածնում անցկացրել է Իրանում ՏՈՒ-154 ինքնաթիռի ավիավթարի զոհերի հոգեհանգստի արարողությունը:
Վեհափառն աղոթել է աղետի զոհվածների հոգիների հանգստության համար: «Աղոթում ենք առ Աստված և խնդրում ենք սփոփել մեզ վշտի և ցավի պահերին, ուժ տալ վերապրելու անփոխարինելի կորստի վիշտը», - ասել է Ամենայն Հայոց Կաթողիկոսը:
Գարեգին Երկրորդն իր ցավակցությունն է հայտնել զոհվածների բոլոր հարազատներին և մտերիմներին, ինչպես նաև Իրանի և Վրաստանի իշխանություններին ու ժողովրդին:
Սգո արարողությանը մասնակցել են ՀՀ վարչապետ Տիգրան Սարգսյանը, ՀՀ ԱԺ խոսնակ Հովիկ Աբրահամյանը, փոխվարչապետ, տարածքային կառավարման նախարար Արմեն Գևորգյանը, Հայաստանում Իրանի դեսպան Սեյեդ Ալի Սահայանը, ՀՀ կառավարության անդամներ:
Թեհրան-Երևան կանոնավոր չվերթն իրականացնող Caspian Airlines ավիաընկերությանը պատկանող Տու-154 ինքնաթիռը չորեքշաբթի ավիավթարի է ենթարկվել Թեհրանի մոտ: Նախնական տվյալների համաձայն՝ ինքնաթիռում գտնվող բոլոր 168 մարդիկ զոհվել են, որոնցից 15-ն անձնակազմի անդամներն էին: ՀՀ ԱԳՆ-ի տվյալների համաձայն՝ ինքնաթիռում գտնվել է շուրջ 40 հայ, որոնցից հինգը՝ Հայաստանի Հանրապետության քաղաքացի:-0-
