Նախօրեին Իրանում ավիավթարի ենթարկված ՏՈՒ-154 ինքնաթիռի զոհերի հարազատները Թեհրան կմեկնեն Երևանի ժամանակով 14:45-ին, հինգշաբթի ՀՀ կառավարության նիստի ժամանակ տեղեկացրեց ՀՀ ՔԱԳՎ պետ Արտյոմ Մովսիսյանը:
Թեհրան-Երևան կանոնավոր չվերթն իրականացնող Caspian Airlines ավիաընկերությանը պատկանող Տու-154 ինքնաթիռը չորեքշաբթի ավիավթարի է ենթարկվել Թեհրանի մոտ: Նախնական տվյալների համաձայն՝ ինքնաթիռում գտնվող բոլոր 168 մարդիկ զոհվել են, որոնցից 15-ն անձնակազմի անդամներն էին: ՀՀ ԱԳՆ-ի տվյալների համաձայն՝ ինքնաթիռում գտնվել է շուրջ 40 հայ, որոնցից հինգը՝ Հայաստանի Հանրապետության քաղաքացի:
Մովսիսյանի խոսքերով, իրանական ավիաընկերություններից մեկի ինքնաթիռը տեղական ժամանակով ժամը 09:30-ին պետք է մեկներ Երևան՝ հարազատներին Իրան տանելու նպատակով, սակայն մի շարք պատճառներով թռիչքը հետաձգվել է գրեթե երկու ժամով:
Նա տեղեկացրեց, որ դեպքի վայր մեկնելու ցանկություն են հայտնել զոհվածների շուրջ 50 հարազատ: Մովսիսյանն ավելացրեց, որ բոլոր ծախսերը հոգալու է Caspian Airlines ավիաընկերությունը:
Ուղևորների հարազատներին կուղեկցեն ՔԱԳՎ-ի ներկայացուցիչներն ու Իրանում Հայաստանի դեսպանատան աշխատակիցները:-0-
