ՀՀ քաղաքացիական ավիացիայի գլխավոր վարչության թռիչքային անվտանգության տեսչական վարչության պետ Սերոբ Կարապետյանը կասկածում է, թե Իրանում ՏՈՒ-154 ինքնաթիռի ավիավթարի պատճառը կարող էր մարդկային գործոնը լինել:
Թեհրան-Երևան կանոնավոր չվերթն իրականացնող Caspian Airlines ավիաընկերությանը պատկանող Տու-154 ինքնաթիռը չորեքշաբթի ավիավթարի է ենթարկվել Թեհրանի մոտ: Նախնական տվյալների համաձայն՝ ինքնաթիռում գտնվող բոլոր 168 մարդիկ զոհվել են, որոնցից 15-ն անձնակազմի անդամներն էին: ՀՀ ԱԳՆ-ի տվյալների համաձայն՝ ինքնաթիռում գտնվել է շուրջ 40 հայ, որոնցից հինգը՝ Հայաստանի Հանրապետության քաղաքացի:
Փորձագետի խոսքերով, ավիավթարի պատճառը դեռ դժվար է ասել, քանի որ չկան կոնկրետ նյութեր, և մինչև չվերծանվեն «սև արկղերը», դժվար է որևէ վարկած առաջ քաշել:
«Սակայն Caspian Airlines-ը երկար ժամանակ է, ինչ շահագործում է այս տիպի ինքնաթիռները և չեմ կարծում, որ կարող է մարդկային գործոնի խնդիր լինել, մասնավորապես՝ օդաչուների վատ կամ թույլ պատրաստվածության խնդիրը», - ասել է Կարապետյանը Հայաստանի հանրային հեռուստատեսությանը տված հարցազրույցում:
«Տու-154-ի ավիավթարը կարող էր լուրջ պատճառի հետևանք լինել, այլ ոչ միայն մարդկային գործոնի: Կարող եմ հստակ ասել, որ այդ տիպի ինքնաթիռն ունի երեք շարժիչ, և բոլոր համակարգերը եռապատկված են, այն չէր կարող այսպես հեշտությամբ վթարի ենթարկվել, կործանումը կարող էր լուրջ պատճառի հետևանք լինել, որը պետք է պարզեն փորձագետները», - ավելացրել է նա:
Սակայն, ինչպես կարծում է փորձագետը, անհրաժեշտ է հաշվի առնել, որ բոլոր խնդիրները, այդ թվում նաև տեխնիկական թերություններն, այսպես թե այնպես, կապված են հիմնականում մարդկային գործոնի հետ:
Նրա խոսքերով, մինչ հետաքննություն սկսելն անհրաժեշտ է դիտարկել բոլոր վարկածներն ու գնահատել դրանց իրական լինելն ու հավանականությունը, և անհրաժեշտության դեպքում անցկացնել լրացուցիչ փորձաքննություն:
«Եթե իրանական կողմը, որն անցկացնում է հետաքննությունը, հետաքրքրություն հայտնի, ապա ՔԱԳՎ-ն պատրաստ է տրամադրել իր ունեցած ողջ տեղեկատվությունը», - ասել է Կարապետյանը:
Միաժամանակ փորձագետը ընդգծել է, որ Caspian Airlines-ի հետ աշխատանքի ողջ ընթացքում Հայաստանում մտահոգություն առաջացնող որևէ լուրջ խնդիրներ կամ թերությունները չեն առաջացել:-0-
