ԵՄ-ն ցավակցություն է հայտնել Իրանում վթարի ենթարկված Տու-154-ի զոհերի ընտանիքներին

Եվրամիությունը ցավակցություն է հայտնել Իրանի կառավարությանը, զոհերի հարազատներին ու մտերիմներին Տու-154-ի, որը վթարի ենթարկվեց Իրանում և որին վերջին տվյալներով զոհ գնաց 168 մարդ, չորեքշաբթի հաղորդում է «ՌԻԱ Նովոստին»՝ հղում անելով Ֆրանս Փրես գործակալությանը:

«ԵՄ նախագահն իր խորին ցավակցությունն է հայտնում այս սարսափելի միջադեպին զոհ գնացած մարդկանց ընտանիքներին ու մտերիմներին»,- գործակալությունը մեջբերում է Շվեդիայի հրապարակած հայտարարության տեքստը, որը ներկայումս նախագահում է ԵՄ-ում:

Ընդհանուր արտաքին քաղաքականության և անվտանգության քաղաքականության ԵՄ գերագույն ներկայացուցիչ Խավյեր Սոլանայի առանձին հայտարարությունում ասվում է. «Ես կցանկանայի անկեղծ ցավակցություն հայտնել այս ողբերգության զոհերի ընտանիքներին, ինչպես նաև Իրանի կառավարությանը»:   

Իրանում ավիավթարի ենթարկված Թեհրան-Երևան չվերթն իրականացնող ինքնաթիռը, ՀՀ Քաղավիացիայի գլխավոր վարչության տվյալներով՝ կործանվել է ժամը 11.09-ին՝ Իմամ Խոմեյնու անվան միջազգային օդանավակայանից օդ բարձրանալուց 16 րոպե անց։ Այդ ընթացքում ինքնաթիռը հասցրել է հավաքել մոտ 8 կիլոմետր բարձրություն։ Ինքնաթիռն ընկել է Թեհրանից 200 կմ հեռավորության վրա: Բոլոր 154 ուղևորներն ու անձնակազմի 16 անդամները մահացել են: Վթարի պատճառը, նախնական տվյալներով, օդանավի շարժիչներից մեկում բռնկված հրդեհն է եղել։--0--