ՀՀ նախագահ Սերժ Սարգսյանի առաջարկած համաներումը պետք է տարածվեր բոլոր «քաղբանտարկյալների» վրա, երեքշաբթի մամուլի ասուլիսի ժամանակ լրագրողներին հայտնեց հանրապետության գլխավոր դադտախազի նախկին տեղակալ, ընդդիմադիր ՀԱԿ անդամ Գագիկ Ջհանգիրյանը:
Գլխավոր դատախազի նախկին տեղակալ Գագիկ Ջհանգիրյանը ազատ է արձակվել համաներմամբ: Նա անցյալ տարվա մարտին ՔՕ 316 հոդվածի 1 մասով դատապարտվել էր երեք տարվա ազատազրկման:
«Ինձ համար անսպասելի էր, երբ նախագահի հայտարարած համաներմամբ ինձ ազատ արձակեցին: Բայց միևնույն ժամանակ կարող եմ անկեղծ հայտարարել, որ այս առնչությամբ իշխանությունների հետ ոչ մի պայմանավորվածություն ձեռք չի բերվել»,- հայտարարեց Ջհանգիրյանը:
Նրա խոսքերով՝ ՀՀ իշխանությունները սխալ են թույլ տվել ու չեն օգտվել ներքաղաքական կյանքը նորմալացնելու հնարավորությունից՝ չանցկացնելով լիարժեք համաներում և ազատ չարձակելով բոլոր «քաղբանտարկյալներին»:
Միևնույն ժամանակ հանրապետության փոխդատախազը նշեց, որ ՀԱԿ ղեկավարության որոշմամբ՝ ինքը զբաղվելու է ՀԱԿ իրավական պաշտպանության կենտրոնի աշխատանքների համակարգմամբ և պետաիրավական հանձնաժողովի հարցերով:
Հայաստանի խորհրդարանի կողմից հունիսի 19-ին հայտարարված համաներման արդյունքում հուլիսի 12-ի դրությամբ երկրի տարբեր քրեակատարողական հաստատություններից 265 մարդ է ազատ արձակվել,
Հայտարարված համաներման համաձայն, պատժից լիովին ազատվում են, մասնավորապես առավելագույնը երեք տարի ժամկետով ազատությունից զրկելու հետ կապված պատիժների դատապարտված անձինք, այն անձինք, որոնց նկատմամբ պատիժը պայմանականորեն չի կիրառվել կամ պատժի կրումը հետաձգվել է, ինչպես նաև ազատությունից զրկելու հետ չկապված պատիժների դատապարտված անձինք:
Համաներումը տարածվում է 2008թ. մարտի 1-2-ը Երևանում քաղաքում տեղի ունեցած իրադարձությունների առնչությամբ հանցագործություն կատարած անձանց վրա, որոնց հինգ տարի ազատազրկում է սպառնում: -0-
