Երևանյան «Ոսկե ծիրան» կինոփառատոնը աշխարհում ամենահեղինակավորներից մեկը դառնալու բոլոր հնարավորություններն ունի. Խանջյան

ԵՐԵՎԱՆ, 13 հուլիսի. /Նովոստի-Արմենիա/. Երևանյան «Ոսկե ծիրան» միջազգային կինոփառատոնը աշխարհում ամենահեղինակավորներից մեկը դառնալու բոլոր հնարավորություններն ունի, կարծում է կինոփառատոնի ժյուրիի անդամ, հայազգի կանադացի հանրահայտ դերասանուհի Արսինե Խանջյանը:

««Ոսկե ծիրան» փառատոնի որակական աճն ակնհայտ է: Ամենամեծ նվաճումը կարելի է համարել վերջին 6 տարում նրա զարգացման արագ տեմպերը»,- լրագրողներին ասաց Խանջյանը:  

 «Ոսկե ծիրան» 6-րդ միջազգային կինոփառատոնն անցկացվում է Երևանում հուլիսի 12-ից 19-ը։ Մրցութային ֆիլմերը հանդես կգան ավանդական երեք անվանակարգում՝ միջազգային-խաղարկային, վավերագրական և Հայկական համայնապատկեր։

Խոսելով մարդկանց կյանքում կինոյի դերի մասին՝ դերասանուհին նշեց, որ 21-րդ դարում կինոն դադարում է պարզապես արվեստի ժանր լինելուց, բայց և իրենում հզոր քարոզչական տարր է ներառում:   

«Կինոն կարող է ազդել աշխարհում տեղի ունեցող գործընթացների վրա: Միևնույն ժամանակ ֆիլմ ստեղծողը պետք է միայն քարոզչական նպատակ չհետապնդի, նա պետք է նաև արվեստի միջոցով իր մտքերն ու տեսակետներն արտահայտի»,- ասաց Խանջյանը: -0-