Լուարա Հայրապետյանը «Բարսելոնա» ֆուտբոլային ակումբին նվիրված երգով կներկայացնի Հայաստանը Մանկական Եվրատեսիլ-2009 մրցույթին

Լուարա Հայրապետյանը «Բարսելոնա» ֆուտբոլային ակումբին նվիրված երգով կներկայացնի Հայաստանը Մանկական Եվրատեսիլ-2009 մրցույթին:

Մրցույթի մասնակիցների ազգային ընտրական փուլի եզրափակչի հաղթողը որոշվել է Հայաստանի հանրային հեռուստաընկերության ուղիղ եթերում հեռուստադիտողների և ժյուրիի քվեարկության միջոցով:

Եզրափակիչ դուրս գալու համար պայքարում էին յոթ կատարողներ և խմբեր՝ Ջուլի Բերբերյանն ու Լիկա Մուշեղյանը, «Ճերմակ ամպիկներ» խումբը, Լուարա Հայրապետյանը, «Ուրախ ղողանջներ» խումբը, «Զանգակ» խումբն ու Ռազմիկ Աղաջանյանը:

Լուարա Հայրապետյանը տասնմեկ տարեկան է: Չորս տարեկանից աղջնակը սկսել է զբաղվել վոկալով: Չնայած երիտասարդ տարիքին՝ Լուարան բազմիցս դարձել է տարբեր միջազգային և Համառուսական մրցույթների հաղթող:

2003 թ.-ին Վոլգոգրադում կայացած «Ռադուգա» միջազգային փառատոնի ժամանակ «Փոքրիկ հրաշք» անվանակարգում նա արժանացել է Գրան-պրիի: 2006 թ.-ին Տուապսե քաղաքում անցկացված Էստրադային երգի համառուսական մրցույթի ժամանակ ևս նա արժանացել է Գրան-պրիի:

Լուարա Հայրապետյանը 2006 թ.-ին մասնակցել է Ռուսաստանում կայացած «Մանկական Եվրատեսիլ-2006» մրցույթի ընտրական փուլին՝ զբաղեցնելով երկրորդ տեղը:

Լուարան «Սլավյանսկի բազար 2008» միջազգային մանկական մրցույթի հաղթող է: 2008 թ.-ին նա Հայաստանում արդեն մասնակցել է «Եվրատեսիլի» ընտրական փուլին:

Մանկական Եվրատեսիլ-2009-ը կանցկացվի նոյեմբերի 21-ին Կիևում: Մրցույթին կմասնակցեն 13 երկրների ներկայացուցիչներ:-0-