Հայաստանի բյուջեի ծախսերը չեն կրճատվի, չորեքշաբթի լրագրողներին հայտնեց ՀՀ էկոնոմիկայի նախարար Ներսես Երիցյանը։
«Նախօրեին Հայաստանի վարչապետ Տիգրան Սարգսյանը հստակ հայտարարեց այդ մասին, և մենք կփորձենք ապահովել ծախսերի այն մակարդակը, որը կարող է նպաստել տնտեսական աճին»,- ասաց Երիցյանը մամուլի ասուլիսի ժամանակ՝ ամփոփելով «Գլոբալ ճգնաժամի ազդեցությունը Հայաստանի վրա. կարճաժամկետ և երկարաժամկետ հեռանկարներ» միջազգային գիտաժողովի արդյունքները։
Նախարարը պարզաբանեց, որ վերանայման և կրճատման կենթարկվեն ծախսերի այն հոդվածները, որոնք առաջնահերթ կարևորություն չեն ներկայացնում։
«Դա կհանգեցնի նրան, որ ծախսերի մակարդակի պահպանմանը զուգահեռ զգալիորեն կավելանան հակաճգնաժամային, առաջին հերթին, սոցիալական ծախսերն, ինչպես նաև ենթակառուցվածքների ծախսերը»,- ասաց նա։ -0-
