ԵՐԵՎԱՆ, 8 հուլիսի. /Նովոստի-Արմենիա/. Հայաստանում ծրագրվում է փոքր ավիացիայի համար ինքնաթիռներ հավաքելու ձեռնարկություն ստեղծել, չորեքշաբթի լրագրողներին ասաց Հայրենական ապրանքարտադրողների միության նախագահ Վազգեն Սաֆարյանը:
Նրա խոսքերով, Միությունը Հայաստանում փոքր ավիացիայի զարգացման ծրագրի առաջարկների համապատասխան փաթեթ է մշակել, որը շուտով կներկայացվի կառավարության քննարկմանը:
«Ձեռնարկության ստեղծման համար կպահանջվեն ընդամենը 500 հազար դոլարի չափով ներդրումներ, ինչի արդյունքում մենք կկարողանանք Հայաստանում Սու 38Լ /գյուղատնտեսական/ տեսակի փոքր ռուսական ու ամերիկյան ինքնաթիռներ և «Ցեսնա» ինքնաթիռներ հավաքել»,- ասաց Սաֆարյանը:
Նա նշեց, որ ծրագրի համաձայն, ինքնաթիռի մասերը Հայաստան կբերվեն գրեթե 50 տոկոսանոց պատրաստությամբ, և տեղում արդեն կիրականացվի դրանց ավարտին հասցնելն ու վերջնական հավաքումը:
«Դետալների ներկրման, հավաքման ու տեղում պատրաստի ինքնաթիռների արտոնագրման դեպքում, դրանք 5-8 անգամ ավելի էժան կնստեն, քան արտադրող գործարանից դրանք գնելու դեպքում: Մասնավորապես, քաղաքացիական ինքնաթիռները կարող են մինչև 1-1,2 մլն դոլար արժենալ, իսկ գյուղատնտեսականները՝ շուրջ 50 հազար դոլար»,- ասաց Սաֆարյանը:
Նրա խոսքերով, Հայաստանը տարեկան կկարողանա հավաքել շուրջ 20 գյուղատնտեսական և շուրջ 2-3 քաղաքացիական ինքնաթիռ:
Ընդ որում արտադրությունը ծրագրվում է կատարել Արզնի գյուղի մոտ հակակարկտային կայանի տարածքում:
Որպես արտադրանքի իրացման հեռանկարային շուկաներ նա նշեց հայկական ներքին շուկան, ինչպես նաև Միջին Արևելքի երկրների շուկաներն ու ռուսական շուկան, որը, նրա խոսքերով, ամեն տարի 40 գյուղատնտեսական ինքնաթիռի կարիք ունի:
Միության նախագահի խոսքերով, դեռ 2002թ.-ին «Սուխոյ» ընկերության հետ Հայաստանում Սու 38Լ տեսակի գյուղատնտեսական ինքնաթիռներ հավաքելու մասին պայմանավորվածություն է եղել և անգամ համատեղ ձեռնարկություն ստեղծելու մասին որոշում է ընդունվել, ինչի առնչությամբ հնչեցվել է Ռուսաստանի կառավարության առաջարկը, սակայն միջոցների անբավարարության պատճառով նախագիծը սառեցվել է:
«Կարծում եմ, որ ճգնաժամը կարող է օգնել մեզ իրականացնել նման ծրագրեր»,- ասաց Սաֆարյանը: -0-
