ՀՀ Ազգային ժողովը դարձել է Ֆրանկոֆոնիայի խորհրդարանական վեհաժողովի (ՖԽՎ) ասոցացված անդամ, «Նովոստի-Արմենիա» գործակալությանը տեղեկացրեցին ՀՀ ԱԺ հասարակայնության հետ կապերի վարչությունից:
Հայկական խորհրդարանին նման կարգավիճակ տրամադրելու մասին որոշումն ընդունվել է Փարիզում կայացած ՖԽՎ 35-րդ նստաշրջանի լիագումար նիստի ժամանակ, որին մասնակցել է 50 պատվիրակություն, այդ թվում նաև ՀՀ ԱԺ պատվիրակությունը՝ ՀՀ ԱԺ խոսնակ Հովիկ Աբրահամյանի գլխավորությամբ:
Ելույթ ունենալով նիստի ընթացքում՝ ՖԽՎ-ում ՀՀ ԱԺ պատվիրակության ղեկավար Արմեն Ռուստամյանը շնորհակալություն է հայտնել բոլոր նրանց, ովքեր ջանքեր են գործադրել, որպեսզի Հայաստանի խորհրդարանը դառնա Ֆրանկոֆոնիայի խորհրդարանական վեհաժողովի ասոցացված անդամ:
Նրա խոսքերով, Հայաստանը Խորհրդարանական վեհաժողովի ասոցացված անդամի կարգավիճակ ստանալու դիմումը ներկայացրել է այն ժամանակ, երբ նա դարձել է Ֆրանկոֆոնիայի միջազգային կազմակերպության ասոցացված անդամ:
«Դա պատահական չէր: Նման որոշումը, նախևառաջ, հիմնվում է Հայաստանի և Ֆրանսիայի միջև ժամանակի ընթացքում ձևավորված բարեկամական ամուր կապերի վրա: Այն հիմնվում է նաև այս Խորհրդարանական վեհաժողովի որդեգրած համընդհանուր արժեքների` ժողովրդավարության, իրավական պետության, մարդու իրավունքների վրա ևպայմանավորված է մշակութային ու լեզվական բազմազանությանը Հայաստանի նվիրվածությամբ», - ասել է Ռուստամյանը:
Նրա խոսքերով, Քվեբեկի (Կանադա) գագաթաժողովում ասոցացված անդամի կարգավիճակ ստանալուց ի վեր հայկական իշխանություններն այդ ուղղությամբ իրականացրել են մի շարք նախաձեռնություններ և միջոցառումներ:-0-
