«Արթիկ» քրեակատարողական հիմնարկի 15 կալանավոր միջնակարգ դպրոցի ավարտական ատեստատ ստացավ

ԵՐԵՎԱՆ, 3 հուլիսի. /Նովոստի-Արմենիա/. «Արթիկ» քրեակատարողական հիմնարկի 15 կալանավոր միջնակարգ դպրոցի ավարտական ատեստատ ստացավ, «Նովոստի-Արմենիա» գործակալությանը հայտնեց ՀՀ Քրեակատարողական վարչության մամուլի քարտուղար Արսեն Բաբայանը։

«Ատեստատների հանձնման արարողությունը չի կարելի անվանել առաջինը կամ վերջինը ՔԿՀ-ում, քանի որ նմանատիպ միջոցառումներն անցկացվում են հաստատությունում երկար տարիների ընթացքում։ Դա պայմանավորված է նրանով, որ ՔԿՀ-ում արդեն 50 տարի գործում է հանրակրթական դպրոց, ինչը դատապարտյալներին հնարավորություն է տալիս ստանալ միջնակարգ կրթություն կամ շարունակել ընդհատված ուսումը»,- տեղեկացրեց Բաբայանն ուրբաթ։

2009 թվականին ատեստատ ստացած դատապարտյալները հույս հայտնեցին, որ նրանց ձեռք բերած գիտելիքները կօգնեն նրանց ազատության մեջ հեշտությամբ և արագ ինտեգրվել հասարակությունում, աշխատանք գտնել և կարգավորել իրենց կյանքը։ Ավելին, շրջանավարտ-դատապարտյալներից մի քանիսը ցանկություն հայտնեցին շարունակել ուսումը և ստանալ բարձրագույն կրթություն։

Միաժամանակ Բաբայանը հիշեցրեց, որ ՀՀ արդարադատության նախարարության քրեակատարողական հիմնարկներում շարունակվում է դատապարտյալների կրթության գործընթացը, ինչը շատ կարևոր է ինչպես հենց իրենց, այնպես էլ ողջ հասարակության համար։

«ՀՀ արդարադատության նախարարության Քրեակատարողական վարչությունը հուս է հայտնում, որ կրթություն ստանալ ցանկացողների թիվը միայն կաճի, ինչը կնպաստի ոչ միայն ծառայության առջև դրված խնդիրների իրականացմանը, այլ նաև դատապարտյալների ուղղմանը»,- ասվում է հաղորդագրությունում։

2009 թվականի հուլիսի 1-ի դրությամբ ՀՀ քրեակատարողական հիմնարկներում է գտնվում 4002 մարդ։ -0-