Հայաստանը Թուրքիայից երկկողմ հարաբերությունների հաստատմանն ուղղված գործնական քայեր է ակնկալում, ասաց ՀՀ ԱԳ նախարար Էդվարդ Նալբանդյանը:
«Հայաստանի և Թուրքիայի միջև առանց նախապայմանների հարաբերությունների հաստատման և սահմանների բացման վերաբերյալ պայմանավորվածություններ են ձեռք բերվել: Եթե Թուրքիան պատրաստ է նման պայմանավորվածությունների իրագործմանը, ապա մենք կարող ենք միայն ողջունել դա և սպասել գործնական քայլերի», - ուրբաթ մամուլի ասուլիսի ժամանակ ասաց Նալբանդյանը:
ԱԳ նախարարի խոսքերով, Հայաստանի և Թուրքիայի միջև ոչ միայն երկխոսություն է հաստատվել, երկրների միջև լուրջ բանակցություններ են ընթանում, որոնց նոր փուլը սկսվեց նախորդ տարվա սեպտեմբերին:
ՀՀ ԱԳ նախարարը հիշեցրեց, որ 2009թ.-ի գարնանը Հայաստանն ու Թուրքիան որոշակի պայմանավորվածությունների հանգեցին՝ կարգավորել հարաբերություններն ու բացել սահմաններն առանց որևէ նախապայմանի:
Նալբանդյանն ասաց, որ ավելի վաղ թուրքական կողմը հարաբերությունների վերականգնման համար որոշակի նախապայմաններ էր առաջ քաշում, որոնք կապված էին ղարաբաղյան խնդրի կարգավորման և Հայոց ցեղասպանության միջազգային ճանաչման գործընթացի հետ:
«Բանակցությունների ընթացքում մենք համաձայնության եկանք, որ մենք գնում ենք առանց նախապայմանների հարաբերությունների կարգավորման», - հայտարարեց նախարարը:
Հայաստանի և Թուրքիայի միջև բացակայում են դիվանագիտական հարաբերությունները, իսկ հայ-թուրքական սահմանը փակ է 1993 թ.-ից ՝ պաշտոնական Անկարայի նախաձեռնությամբ:
Հայաստանի և Թուրքիայի միջև չկան դիվանագիտական հարաբերություններ՝ Թուրքիայի կողմից առաջ քաշվող նախապայմանների պատճառով։ Թուրքիան երկկողմ հարաբերությունների հաստատաման համար առաջ է քաշում մի շարք նախապայմաններ, մասնավորապես, Հայաստանի կողմից Օսմանյան Թուրքիայում 1915թ. իրագործված Եղեռնի ճանաչմանն ուղղված ջանքերից հրաժարվելը, ղարաբաղյան հիմնախնդրի լուծումը` հօգուտ Ադրբեջանի, ինչպես նաև Հայաստանի կողմից Թուրքիայի սահմանների ճանաչումը:
Առաջին քայլերը հարաբերություններում արվեցին 2008թ. սեպտեմբերի 6-ին, երբ Թուրքիայի նախագահ Աբդուլա Գյուլն առաջին անգամ ՀՀ նախագահ Սերժ Սարգսյանի հրավերով այցելեց Երևան՝ 2010 թ. աշխարհի առաջնության ընտրական փուլի շրջանակներում երկու երկրների հավաքականների միջև ֆուտբոլային հանդիպումը դիտելու համար։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
