Հայաստանի և Իրանի՝ ռազմավարական տեսակետից կարևոր ծրագրերի շուրջ համագործակցությունը կշարունակվի, Երևանում Մամուլի ազգային ակումբում տեղի ունեցած ասուլիսի ժամանակ հայտարարեց ՀՀ-ում ԻԻՀ արտակարգ և լիազոր դեսպան Սեյեդ Ալի Սաղայանը:
«Մենք առանձնահատուկ նշանակություն ենք տալիս և Իրան-Հայաստան գազատարի և երկաթուղու նախագծման աշխատանքներին»,- ասաց դիվանագետը:
Նրա խոսքերով, այդ նախագծերը տարածաշրջանային նշանակություն ունեն, և «պատահական չէ, որ Ռուսաստանը, Ղազախստանն ու Թուրքմենստանն իրենց շահագրգռվածությունը հայտնեցին այս նախագծերում»:
«Բացի այդ ծրագրվում է երկու երկրների միջև ապրանքաշրջանառության ծավալը հասցնել մինչև տարեկան 500 մլն դոլարի: Տվյալ պահին ապրանքաշրջանառության ծավալը 250 մլն դոլար է կազմում»,- ասաց Սաղայանը:
Խոսելով հայ-թուրքական հարաբերությունների հաստատման մասին՝ դեսպանը նշեց, որ Իրանը քաջալերում է տարածաշրջանում հակասությունների կարգավորման ուղղությամբ ձեռնարկվող բոլոր քայլերը:
«Ցանկացած հակասությունների հարթեցումը նպաստում է տարածաշրջանում կայունության ամրապնդմանը և արդյունքում տարածաշրջանային զարգացմանը»,- նշեց նա:
2004 թ.-ին Հայաստանի կառավարությունը նախաձեռնեց Իրան-Հայաստան գազատարի շինարարությունը բնական գազի մատակարարման ռեսուրսային բազայի ընդլայնման և հանրապետություն երկրորդ տեխնոլոգիական մուտքի ստեղծման նպատակով:
Իրան-Հայաստան երկաթուղու շինարարության մասին վերջնական հուշագիրը Թեհրանում ստորագրեցին Իրանի ճանապարհների և հաղորդակցությունների նախարար Համիդ Բիհբահանին և ՀՀ տրանսպորտի նախարար Գուրգեն Սարգսյանը ընթացիկ տարվա ապրիլի 13-14-ը ՀՀ նախագահ Սերժ Սարգսյանի գլխավորած պատվիրակության Իրան կատարած այցի շրջանակներում։
Իրանի կողմի հավաստմամբ, շինարարության ողջ գործընթացը կտևի 5,5 տարի, իսկ նախագծի ընդհանուր ծախսերը 1-1,2 մլրդ ԱՄՆ դոլար կկազմեն։
Երկաթուղու երկարությունը 470 կմ կլինի, որից 60 կմ-ը կանցնի Իրանի, իսկ մնացած 410 կմ-ը՝ Հայաստանի տարածքով։
Տվյալ երկաթուղին թույլ կտա Հայաստանին օգտվել էներգետիկ ռեսուրսներ և այլ ապրանքներ փոխադրելու այլընտրանքային ուղուց՝ ելք ունենալով դեպի արտաքին աշխարհ, մինչդեռ այժմ Հայաստանի երկաթուղային հաղորդակցությունն իրականացվում է միայն Վրաստանի միջով։ --0—
