Լեռնային Ղարաբաղի նախագահը շնորհավորել է ՀՀ նախագահին 55-ամյակի կապակցությամբ
Լեռնային Ղարաբաղի նախագահ Բակո Սահակյանը երեքշաբթի շնորհավորական ուղերձ է հղել ՀՀ նախագահ Սերժ Սարգսյանին ծննդյան 55-ամյա հոբելյանի կապակցությամբ «Նովոստի-Արմենիա» գործակալությանը հայտնեցին ԼՂՀ նախագահի աշխատակազմի Տեղեկատվության գլխավոր վարչությունից:
Արցախի ժողովրդի և անձամբ իմ անունից ջերմորեն շնորհավորում եմ Ձեզ` Ձեր ծննդյան 55-ամյակի կապակցությամբ:
Դուք կարող եք հպարտության զգացումով նայել Ձեր անցած ճանապարհին, քանի որ այդ ամբողջ ընթացքում անձնվիրաբար ծառայել եք հարազատ ժողովրդին և նրա շահերի պաշտպանության գործին: Այսօր էլ, զբաղեցնելով Հայաստանի Հանրապետության նախագահի բարձր ու պատասխանատու պաշտոնը, անում եք հնարավորը համազգային նպատակների ու գաղափարների իրականացման համար»,- իր ուղերձում հայտարարել էր Սահակյանը:
«Մեկ անգամ ևս շնորհավորում եմ Ձեզ հիշարժան տարեդարձի առթիվ և մաղթում ամենայն լավն ու բարին: Թող Աստված երկար կյանք, առողջություն և մեծագույն հաջողություններ պարգևի Ձեզ` ի նպաստ Հայաստանի Հանրապետության և Լեռնային Ղարաբաղի Հանրապետության հզոր ու բարգավաճ ապագայի»,- ասվում է ԼՂՀ նախագահի շնորհավորական ուղերձում:-0-
