Երևանում ՀՀ ՊՆ խաղաղապահ բրիգադի զինծառայողներին բժշկական դասընթացներն անցնելու մասին վկայագրեր են հանձնել

ԵՐԵՎԱՆ, 18 հունիսի. /Նովոստի-Արմենիա/. Երևանում հինգշաբթի ՀՀ պաշտպանության նախարարության խաղաղապահ բրիգադի 33 զինծառայողի բժշկական դասընթացներն անցնելու վկայագրեր են հանձնել:

12 շաբաթ տևող դասընթացների ընթացքում մասնակիցները ծանոթացել են դեպքի վայրի վերլուծության, շտապ վնասվածքաբանական գնահատականի մեթոդիկայի, իրավիճակների դասակարգման և վերահսկման հետ, ինչպես նաև ուսումնասիրել են ռազմական բժշկության և մարտավարական բուժօգնության հիմունքները:

«Բարձր եմ գնահատում այս դասակի պատրաստվածության մակարդակը: Մենք ծառայություն ենք վարում տարբեր մարզերում և պարտավորությունները կապված են որոշակի ռիսկի հետ: Նման պատրաստվածություն ունեցող ստորաբաժանման առկայության դեպքում մենք պատրաստ ենք յուրաքանչյուր իրավիճակում տուժածներին առաջին օգնություն ցուցաբերել», - արարողության ժամանակ ասաց խաղաղապահ բրիգադի հրամանատար, գնդապետ Արթուր Սիմոնյանը:

Նա նաև նշեց, որ բոլոր զինծառայողներն էլ դասընթացներն ավարտել են բարձր գնահատականներով:

Հայաստանում ԱՄՆ արտակարգ և լիազոր դեսպանի տեղակալ Ջոզեֆ Փենինգթոնն (Joseph Penington) իր հերթին ասաց, որ Միացյալ Նահանգները շարունակելու է նախապատրաստել  բժշկական կազմը արտակարգ իրավիճակներին արագ արձագանքելու ոլորտում:

«Շնորհավորում եմ դասընթացների բոլոր մասնակիցներին, բոլոր խաղաղապահները բարձր առաջադիմություն են ցուցաբերել և հասել են այնպիսի մակարդակի, որ կարող են մրցել աշխարհի առաջատար զինվորական բժիշկների հետ», - ասաց Փենինգթոնը:

Մարտի 30-ից սկսած ԱՄՆ դեսպանատան Ռազմական համագործակցության գրասենյակի և ԱՄՆ ԶՈՒ եվրոպական հրամանատարության նախաձեռնությամբ ՀՀ պաշտպանության նախարարության խաղաղապահ բրիգադում գործում է հրահանգիչների արտագնա խումբ, որը նախապարտաստում է խաղաղապահներին:

Դասընթացների նպատակը խաղաղապահ բրիգադի բժշկական դասակին բժշկական հմտություններ սովորեցնելն է, ինչը թույլ կտա զինծառայողներին միջազգային որակավորում ստանալ և համատեղ գործողությունների ընթացքում համագործակցություն ապահովել այլ ստորաբաժանումների հետ:

ԱՄՆ դեսպանատան Ռազմական համագործակցության գրասենյակը գործում է Հայաստանում՝ ԱՄՆ առաքելության և ԱՄՆ ԶՈՒ եվրոպական հրամանատարության ղեկավարի հովանու ներքո, որը գտնվում է Շտուտգարտում:-0-