Իրանի դերն արևմուտքում վերջին շրջանում զգալիորեն աճել է, և ԱՄՆ-ն ստիպված է երկխոսության գնալ Իրանի հետ՝ անկախ նախագահի ով լինելուց, կարծում է Քաղաքական հետազոտությունների կենտրոնի ղեկավար, քաղաքական գիտությունների թեկնածու Սևակ Սարուխանյանը:
«Իսլամական հեղափոխությունից հետո Իրանում անցած տարիներին ԱՄՆ-ն առիթը բաց չի թողել քննադատել Իրանին երկրում ժողովրդավարության բացակայության, մարդու իրավունքները խախտելու համար: Այսօր 30 տարում առաջին անգամ Թեհրանի փողոցներում տեղի են ունենում բախումներ, կան զոհեր, իսկ այդ իրադարձությունների գնահատականները ԱՄՆ-ի կողմից բավականին հավասարակշռված են»,- ասաց Սարուխանյանը չորեքշաբթի մամուլի ասուլիսի ժամանակ:
Երեքշաբթի ԱՄՆ նախագահ Բարաք Օբաման Իտալիայի վարչապետ Սիլվիո Բերլուսկոնիի հետ հանդիպման ժամանակ հայտարարեց, որ իրանցի ժողովուրդն իր առաջնորդներին ինքնուրույն ընտրելու իրավունք ունի, և Ամերիկան հարգում է իրանական ընտրությունը:
Ուրբաթ օրը տեղի ունեցած նախագահական ընտրությունների վերջնական արդյունքների համաձայն, գործող նախագահ Մահմուդ Ահմադինեժադը հավաքել է 62,63 տոկոս, իսկ նրա հիմնական մրցակիցը՝ նախկին վարչապետ Միրհոսեյն Մուսավին՝ 33,75 տոկոս, մյուս երկու թեկնածուները հավաքել են ավելի քան 2 տոկոս:
Արդյունքները հայտարարելուց հետո Թեհրանի փողոցներ են դուրս եկել Ահմադինեժադի հակառակորդներն ու քվեարկության արդյունքներից դժգոհ մարդիկ: Բողոքողներն իրականացնում էին հրկիզումներ, ավերում էին խանութներ: Ոստիկանության հետ բախումներին ընդդիմության հազարավոր կողմնակիցներ էին մասնակցում:
Սարուխանյանի խոսքերով, առանց Իրանի օգնության ու մասնակցության ԱՄՆ-ն չի կարող լուծել իր առջև կանգնած հիմնական մարտահրավերները:
«Ստեղծված իրավիճակում ԱՄՆ-ն Իրանի հետ երկխոսության կգնա, մեկ այլ հարց է, թե Իրանը որքանով պատրաստ կլինի ԱՄՆ-ի հետ լայն երկխոսության»,- ամփոփեց Սարուխանյանը: -0-
