Ռուսական կողմը հունիսի 12-ին մեկ տրանշով Կենտրոնական բանկի հաշվին է փոխանցել 500 մլն դոլարի չափով կայունացնող վարկի միջոցները, որոնք այսօրևեթ կփոխանցվեն ՀՀ ֆինանսների նախարարության միացյալ գանձարանային հաշվին, ուրբաթ «Նովոստի-Արմենիա» գործակալությանը հայտնեցին Ֆինանսների նախարարության մամուլի ծառայությունից։
ՌԴ և ՀՀ ֆինանսների նախարարներ Ալեքսեյ Կուդրինն ու Տիգրան Դավթյանը մայիսի 20-ին Երևանին 15 տարի ժամկետով 500 մլն. դոլարի վարկ տրամադրելու մասին համաձայնգիր են ստորագրել LIBOR + 3% տոկոսադրույքով՝ ճգնաժամի պայմաններում երկրի տնտեսությանը սատարելու նպատակով:
«Հունիսի 11-ին՝ ներպետական ընթացակարգերի կատարման մասին ծանուցման օրը, ուժի մեջ է մտել «Հայաստանի Հանրապետության կառավարության և Ռուսաստանի Դաշնության կառավարության միջև Հայաստանի Հանրապետությանը պետական վարկ տրամադրելու մասին» համաձայնագիրը, համաձայն որի Հայաստանին տրամադրվում 500.0 մլն ԱՄՆ դոլարի վարկ, 15 տարի մարման ժամկետով, որից 4 տարին արտոնյալ և LIBOR + 3% տարեկան տոկոսադրույքով»,- ասվում է հաղորդագրության մեջ:
Վարկի միջոցները հիմնականում կուղղվեն տնտեսության կայունացմանն ու զարգացմանը, մասնավորապես, նախատեսվում է իրականացնել աղետի գոտու վերականգնման ծրագրեր, փոքր ու միջին բիզնեսի վարկավորում, համակարգաստեղծ ձեռնարկությունների վարկավորում, ինչպես նաև հակաճգնաժամային միջոցառումների իրականացման համար կայունացնող հիմնադրամի ձևավորում:
Պետական վարկի միջոցներն օգտագործվելու են հետևյալ ուղղություններով. տնտեսության, այդ թվում համակարգաստեղծ ձեռնարկությունների վարկավորման, ազգային հիփոթեքային ընկերությանը աջակցության, Հայաստանի Հանրապետության պետական բյուջեի դեֆիցիտի ֆինանսավորման, անհրաժեշտության դեպքում, օրենքով կամ Հայաստանի Հանրապետության կառավարության կողմից սահմանվող այլ ուղղություններով օգտագործելու համար:
Բյուջետային օրենսդրությամբ սահմանված կարգով պետական վարկի միջոցների շրջանառությունը արտացոլվելու է պետական բյուջեում և վերջինիս կատարողական հաշվետվություններում, ինչպես նաև ապահովվելու է պետական վարկի միջոցների ծախսայի հոդվածների առանձին հաշվառում:
Հայաստանի Ազգային ժողովը հունիսի 2-ի արտահերթ նիստի ժամանակ վավերացրել է 500 մլն ԱՄՆ դոլար ռուսական վարկի ստացման մասին համաձայանգիրը: Փաստաթղթի վավերացմանը դեմ են արտահայտվել «Ժառանգություն» ընդդիմադիր խմբակցության պատգամավորները, իսկ ՀՅԴ խմբակցությունը ձեռնպահ է մնացել քվեարկության գործընթացից՝ իր որոշումը հիմնավորելով Հայաստանին վարկ տրամադրելու անբավարար պայամաններով։ -0-
