ԵՐԵՎԱՆ, 12 հունիսի. /Նովոստի-Արմենիա/. ՀՀ տրանսպորտի և կապի նախարար Գուրգեն Սարգսյանի գլխավորած պատվիրակությունը հունիսի 15-16-ը կմասնակցի Իսիկ-Կուլում (Ղրղզստան) կայանալիք ՏՐԱՍԵԿԱ (Transport Corridor Europe Caucasus Asia) միջկառավարական հանձնաժողովի տարեկան նիստին:
Ինչպես տեղեկացնում է տրանսպորտի նախարարության պաշտոնական կայքը, հունիսի 15-ին կկայանա ՏՐԱՍԵԿԱ ազգային քարտուղարների նիստը, որի ընթացքում քննարկվելու է տարեկան նիստի օրակարգի նախագիծը, ինչպես նաև ներկայացվելու են ՏՐԱՍԵԿԱ նախագծերը:
Հունիսի 16-ին կայանալու է ՏՐԱՍԵԿԱ միջկառավարական հանձնաժողովի տարեկան նիստը, որի ընթացքում քննարկվելու են ՏՐԱՍԵԿԱ հանձնաժողովի մշտական քարտուղարության ֆինանսավորման, 2008-2009 թվականների գործողությունների ծրագրի իրականացման հարցերը:
Նիստի ընթացքում նախատեսվում է քննարկել միջազգային կազմակերպությունների հետ փոխըմբռնման հուշագրի ստորագրման նպատակահարմարության և ՏՐԱՍԵԿԱ կառույցների բարեփոխումների հարցերը, ինչպես նաև կայանալու են ՏՐԱՍԵԿԱ միջակառավարական հանձնաժողովի մշտական քարտուղարության գլխավոր քարտուղարի ընտրությունները:
Նախատեսվում է ՏՐԱՍԵԿԱ մուլտիմոդալ տրանսպորտի զարգացման մասին համաձայնագրի ստորագրում:
Ներկայումս ՏՐԱՍԵԿԱՆ միջկառավարական հանձնաժողով է, որը միավորում է Հայաստանը, Վրաստանը, Ադրբեջանը, Ղազախստանը, Ղրղզստանը, Տաջիկստանը, Թուրքմենիան, Բուլղարիան, Ռումինիան, Թուրքիան, Ուկրաինան և Մոլդովան, որոնք 1998 թվականին ստորագրել են «Բազային բազմակողմանի համաձայնագիր Եվրոպա – Կովկաս – Ասիա միջանցքի զարգացման միջազգային տրանսպորտի մասին»։
TRACECA ծրագիրը ենթադրում է Եվրոպա – Կովկաս – Ասիա միջազգային միջանցքի զարգացումը՝ որպես այլընտրանքային երթուղի արդեն գոյություն ունեցողների համար։ -0-
