Հայ խորհրդարանականները խստացնում են քրեական պատասխանատվությունը մարդկանց առևտրի համար

ՀՀ Ազգային Ժողովի պատգամավորները չորեքշաբթի նիստում առաջին ընթերցմամբ փոփոխություններ և լրացումներ կատարեցին Քրեական օրենսգրքում։

Ինչպես հայտնեց ՀՀ արդարադատության նախարար Գևորգ Դանիելյանը, հիմնական փոփոխությունները կատարվում են ՔՕ 132 և 132.1 հոդվածներում, որոնք քրեական պատասխանատվություն են սահմանում մարդկանց առևտրի և մարմնավաճառության մեջ ներգրավելու կամ սեռական շահագործման, ստրկական աշխատանքի կամ ծառայության, ստրկության մեջ պահելու կամ ստրկությանը նման վիճակում պահելու համար։

Նախարարի խոսքերով՝ տվյալ հոդվածները հայկական օրենսդրության համար հարաբերականորեն նոր են և նմանատիպը չեն ունեցել խորհրդային ժամանակներում, սակայն ժամանակակից իրողությունները թելադրում են տվյալ հոդվածների ներդրումը, որոնք վերջին 4-5 տարիների ընթացքում բազմիցս վերանայվել են։ Դանիելյանը հայտնեց, որ այս հոդվածների նման հաճախակի վերանայումը պայմանավորված է համաշխարհային արագ փոփոխվող իրավիճակով։

Ինչպես նշեց նախարարը, լրացումներով առաջարկվում է փոփոխել ՔՕ մարդկանց առևտրի մասին 132-րդ հոդվածի տեքստը և պատասխանատվություն սահմանել, մասնավորապես, մարդկանց հավաքագրման, փոխադրման, հանձնման, թաքցնելու կամ ստանալու համար ոչ միայն առևանգման կամ իշխանության չարաշահման, այլև խաբերության կամ վստահության չարաշահման ճանապարհով, ինչպես նաև բռնության կիրառման կամ կիրառելու սպառնալիքով։

Միաժամանակ լրացումներով խստացվում է մարդկանց առևտրի համար կիրառվող պատժամիջոցը. մասնավորապես, նախնական պայմանավորվածությամբ մարդկանց խմբի կողմից մարդկանց առևտրի, երկու կամ ավելի մարդկանց նկատմամբ առևտրի, ինչպես նաև անչափահաս անձի առևտրի համար, պաշտոնատար դիրքի օգտագործմամբ, ներկայիս ազատազրկման 7-10 տարիներին ավելանում է նաև պատժամիջոց գույքի առգրավման տեսքով։

Արդարադատության նախարարն ավելացրեց, որ վերանայումը վերաբերել է նաև ՔՕ 132.1 հոդվածին, որը պատասխանատվություն է նախատեսում մարմնավաճառությամբ զբաղվելու մեջ ներգրավելու կամ սեռական շահագործման,  ստրկական աշխատանքի կամ ծառայությունների, ստրկության մեջ պահելու կամ ստրկությանը նման իրավիճակում պահելու համար։

Մասնավորապես, հոդվածով ավելի լայն է հասկացվում տվյալ հանցագործությունը, իսկ տվյալ գործողություններում ներգրավելու մեթոդներից է համարվում, փոփոխությունների համաձայն, խաբեությունը, վստահության չարաշահումը, բռնության կիրառումը կամ կիրառման սպառնալիքը, իսկ տվյալ հանցագործության համար 5-10 տարի ազատազրկմանն ավելանում է  նաև գույքի առգրավումը։ -0-