ԵՐԵՎԱՆ, 9 հունիսի. /Նովոստի-Արմենիա/. Վերակառուցման և զարգացման եվրոպական բանկը հայտարարել է Հայաստանում ռազմավարական նոր ծրագրի մեկնարկի մասին, որի շրջանակներում 2009-2010 թթ. ընթացքում երկրի տնտեսությանը կտրմադրվի 180 մլն եվրոյի աջակցություն։
Ինչպես երեքշաբթի «Նովոստի-Արմենիա» գործակալությանը հայտնեցին ՎԶԵԲ-ի մամուլի ծառայությունից, Եվրաբանկը պատրաստ է ներդնել ավելի քան 180 մլն եվրո Հայաստանի տնտեսության տարբեր ոլորտներում հաջորդ երկու տարիներին՝ ըստ ՎԶԵԲ-ի՝ Հայաստանի գծով վերջին ռազմավարության։
ՎԶԵԲ-ի 2009-2010թթ. ռազմավարությունը կենտրոնանում է այն ոլորտների վրա, որոնք կօգնեն երկրում նվազեցնելու տնտեսական անկման ազդեցությունը։
Մասնավորապես, ՎԶԵԲ-ը կպահպանի իր հանձնառությունը աջակցելու մասնավոր միկրո, փոքր և միջին ձեռնարկւոթյուններին՝ տրամադրելով այս հատվածի զարգացման համար անհրաժեշտ ֆինանսավորում տեղական գործընկեր բանկերի միջոցով։
Միժամանակ ՎԶԵԲ-ը կզարգացնի իր աջակցությունը Հայաստանյան բանկերին՝ առաջարկելով վարկեր ենթավարկավորման համար և ընտրողաբար կիրականացնի բաժնեմասնակցություններ Հայաստանի առաջատար բանկերում և կխրախուսի բանկային հատվածի համախմբումը։
Եվրաբանկը բացահայտել է նաև մի շարք կարևոր խնդիրներ, որոնք պետք է լուծված լինեն երկրում՝ ներառելով հայկական տնտեսության դիվերսիֆիկացիան, արտահանմանն ուղղված ձեռնարկությունների մրցունակության լավացումը, մրցակցության աջակցությունը և մենաշնորհների սահմանափակումը, կոռուպցիայի դեմ պայքարը, ֆինանսական հատվածի ամրապնդումը և հասարակական ենթակառուցվածքների առևտրայնացման խթանումը։
Վերջին չորս տարիների ընթացքում ՎԶԵԲ-ի ներդրումները Հայաստանում ավելացել են ավելի քան չորս անգամ և հասել 125 մլն եվրոյի 43 ծրագրերի գծով։ Հաջորդ երկու տարիների համար բանկի սպասվող ծրագրերի նախատեսված պորտֆելը Հայաստանում կգերազանցի 30 ծրագիրը՝ ավելի քան 180 մլն եվրո ընդհանուր գումարը։
ՎԶԵԲ-ը Հայաստանի խոշոր ներդրողներից է, որը 64 ծրագրերի իրականացման միջոցով 240 մլն եվրո է ներդրել:
Հայաստանը ՎԶԵԲ-ի անդամ է դարձել 1992թ. դեկտեմբերի 7-ին՝ 10 մլն. եվրո մասնաբաժնով։ --0—
