Հայկական երկաթուղու կառավարման կոնցեսիոն պայմանագրում փոփոխություններ և լրացումներ կմտցվեն, հինգշաբթի «Նովոստի» միջազգային մամուլի կենտրոնում տեղի ունեցած ասուլիսի ժամանակ ասաց «Հարավկովկասյան երկաթուղի» ՓԲԸ-ի գլխավոր տնօրեն Շևքեթ Շայդուլինը։
«Հայկական երկաթուղու» (ՀԵՈՒ) կոնցեսիոն կառավարումն իրականացնում է «Ռուսական երկաթուղի» ԲԲԸ-ի հարյուրտոկոսանոց դուստրը՝ «Հարավկովկասյան երկաթուղի» (ՀԿԵՈՒ) ՓԲԸ-ն։
«ՀՀ տրանսպորտի և կապի նախարարության հետ համատեղ մենք սկզբունքային մոտեցումներ ենք սահմանել կոնցեսիոն պայմանագրի փոփոխության և լրացման վերաբերյալ», - ասաց Շայդուլլինը։
Նրա խոսքերով, արդեն Հայաստան է ժամանել համապատասխան աշխատանքային խումբը, որը բանակցություններ է վարում ՀՀ տրանսպորտի և կապի նախարարության հետ, ստեղծվել է կատարվող փոփոխությունների վերաբերյալ համապատասխան եռակողմ արձանագրություն։
«Կոնցեսիոն պայմանագրի մեջ սկզբունքորեն փոփոխություններ են մտցվելու, որոնք ուղղված են, առաջին հերթին, ՀԿԵՈՒ-ի արդյունավետ աշխատանքի և տրանսպորտային սպասարկման որակի բարձրացման, որը մենք պարտավոր կլինենք կատարել», - ասաց Շայդուլլինը։
ՀԿԵՈՒ-ն իր բալանսում ընդունել է ՀԵՈՒ շարժակազմը 2008թ. հունիսի մեկից՝ «Հայկական երկաթուղիներ» պետական ՓԲԸ-ն 30 տարի ժամկետով փոխանցելու, կողմերի փոխադարձ համաձայնությամբ ևս 20 տարի երկարացման իրավունքով, 2008թ. փետրվարի 13-ի կոնցեսիոն պայմանագրին համապատասխան։-0-
