Հայաստանի նախագահը «ուժայիններին» հանձնարարել է առաջարկ մտցնել համաներման առնչությամբ

Հայաստանի նախագահ Սերժ Սարգսյանը երեքշաբթի իրավապահ համակարգի պատասխանատուների մասնակցությամբ անցկացված խորհրդակցության ընթացքում համապատասխան գերատեսչություններին հանձնարարել է մինչև ս.թ. հունիսի 15-ը համաներման պայմանների և իրավական ընթացակարգերի վերաբերյալ ներկայացնել իրենց առաջարկությունները, «Նովոստի-Արմենիա» գործակալությանը հայտնեցին երկրի ղեկավարի մամուլի ծառայությունից։

«Նախագահի աշխատակազմին հանձնարարվել է նշված ժամկետում ամփոփել նաև քաղաքական ուժերից, գործիչներից և Հանրային խորհրդից ստացված առաջարկությունները»,- նշվում է հաղորդագրությունում։ 

Նախագահն առաջարկել է բոլոր քաղաքական ուժերին և հասարակական գործիչներին, մասնավորապես, Հանրային խորհրդին, նախագահի նստավայր ներկայացնել իրենց առաջարկությունները համաներման անցկացման անհրաժեշտության և կարգի վերաբերյալ։

Հայաստանի Սահմանադրության համաձայն՝ համաներման նախաձեռնության իրավունքով լիազորված է երկրի նախագահը, ինչից հետո այն հաստատում է խորհրդարանը։

Մայիսի 28-ին նախագահը պատրաստակամություն հայտնեց օգտվել համաներում շնորհելու իր սահմանադրական իրավունքից։Նախագահի խոսքերով՝ վերջին համաներումը հայտարարվել է 2006 թվականին, և եթե երեք տարվա ընթացքում երկրում հասունացել է նոր համաներում կրրառելու գաղափարն, ապա ինքը  պատրաստ է օգտվել իր սահմանադրական իրավունքից։

Նախագահը նշել է, որ եթե պարզվի, որ իսկապես համաներում հայտարարելու անհրաժեշտություն կա, ապա ինքն անմիջականորեն այդ հարցով կդիմի խորհրդարան։

Ավելի վաղ ՀՀ խորհրդարանի խոսնակ Հովիկ Աբրահամյանը չէր բացառել նախագահի կողմից մարտի 1-ի զանգվածային անկարգությունների գործով ձերբակալվածների նկատմամբ համաներում հայտարարելու հնարավորությունը։--0--