Հայաստանում առաջին անգամ անցկացվող «Կենգուրու» միջազգային մաթեմատիկական մրցույթի երևանյան մասնակիցների մրցանակաբաշխությունները տեղի կունենան հունիսի 2-3-ը։ Այս մասին «Նովոստի-Արմենիա» գործակալությանը տեղեկացրեցին «Այբ» կրթական հիմնադրամի մամուլի ծառայությունից, որը Հայաստանում մրցույթի բացառիկ կազմակերպիչն է։
Մայիսի 25-ից հունիսի 1-ը մրցույթի կազմակերպիչները շրջեցին Հայաստանի մարզերի 24 քաղաքներով և անցկացրեցին մրցանակաբաշխության միջոցառումներ` մարզպետարանների կրթության վարչությունների, քաղաքապետարանների կրթության բաժինների ղեկավարների և այլ պաշտոնյաների մասնակցությամբ։
Մրցանակաբաշխությանը մասնակից բոլոր երեխաներն ու դպրոցները ստանում են հավաստագրեր, լավագույնները` նաև պատվոգրեր ու մրցանակներ, հատուկ մրցանակի արժանացածները` խրախուսական մրցանակներ:
Առաջին անգամ Հայաստանում անցկացվող «Կենգուրու» միջազգային մաթեմատիկական մրցույթում հաղթեց Գեղարքունիքի մարզի ութերորդ դասարանի աշակերտուհի Էռնա Պետրոսյանը, ով կմասնակցի Ռումինիայում անցկացվող ամառային ճամբարին։
Բարձր ցուցանիշներ ցույց տվեց 111 աշակերտ, և, ընդհանուր առմամբ, մրցույթի արդյունքները Հայաստանում բարձր էին։ Այս մրցույթի էությունը նրանում է, որ մասնակիցները չեն մրցում միմյանց հետ, այլ ստուգում են իրենց գիտելիքները:
«Կենգուրու» մրցույթին Հայաստանում մասնակցեց ավելի քան 30 հազար աշակերտ հանրապետության 570 դպրոցից։
Մրցույթի գլխավոր հովանավորն էր ՎՏԲ Հայաստան բանկ ՓԲԸ-ը։
«Կենգուրուն» տրամաբանական և բավականին հետաքրքրաշարժ խնդիրներից կազմված մրցույթ է, որն ամեն տարի նույն օրն անցկացվում է մոտ 50 երկրում` ավելի քան 5 միլիոն դպրոցականի մասնակցությամբ:
«Կենգուրու» մրցույթն անցկացվում է անմիջականորեն դպրոցներում` երեխաների համար հարազատ միջավայրում, և մասնակցության նախապայմաններ չկան: Երեխաներից չի պահանջվում դպրոցական ծրագրի, բանաձևերի փայլուն իմացություն կամ միայն գերազանց գնահատականներ մաթեմատիկայից: Փոխարենը` «Կենգուրուի» խաղային ոճով կազմված խնդիրները դուր են գալիս տարբեր առաջադիմություններով երեխաներին: Մրցույթը դպրոցականների շրջանում մեծ մասսայականություն է վայելում նաև շնորհիվ մասնակիցների տարիքային լայն խմբերի: -0-
