«Ընտրությունը քոնն է» կազմակերպությունը կոչ է արել միջազգային դիտորդներին ձեռնպահ մնալ Երևանի Ավագանու խորհրդի ընտրությունների շաբլոն գնահատականներից
«Ընտրությունը քոնն է» հասարակական կազմակերպությունը կոչ է արել միջազգային դիտոդներին ձեռնպահ մնալ Երևանի Ավագանու խորհրդի ընտրությունների շաբլոն գնահատականներից։
Եվրոպացի դիտորդները հայտարարել են, որ Երևանի Ավագանու խորհրդի ընտրությունները կազմակերպվել են եվրոպական չափանիշներին համապատասխան։ Դիտորդների առաքելությունը զգալի առաջընթաց է արձանագրել 2008 թ.-ի սեպտեմբերին Հայաստանում անցկացված տեղական ինքնակառավարման մարմինների ընտրությունների համեմատ։
«Բնավ չնեսամացնելով միջազգային դիտորդների դերակատարումը՝ կցանկանայինք վերջինների կողմից տրվող շաբլոն գնահատականներից՝ արդար – անարդար, ազատ – անազատ։ Մենք կարծում ենք, որ փոքր դրական տեղաշարժը չի կարող արդարացնել այն հույսերն ու ակնկալիքները, որոնք շարքային ընտրողն սպասում է քաղաքական ուժերից, ընտրական պաշտոնյաներից և, ընդհանուր առմամբ, քաղաքական գործընթացներից», - երեշքաբթի լրագրողներին ասաց «Ընտրությունը քոնն է» հասարակական կազմակերպության մամուլի քարտուղար Հասմիկ Սարգսյանը։
Նրա խոսքերով, «Ընտրությունը քոնն է» կազմակերպությունը կոչ է անում իշխանություններին և քաղաքական ուժերին՝ օգտագործել այս ընտրությունների ընթացքում արձանագրված դրական տեղաշարժն ու միտումները՝ դրանք առավելագույնի հասցնելու համար։
«Միաժամանակ անհրաժեշտ է մանրամասն ուսումնասիրել արձանագրված բացթողումները, խախտումներն ու չարաշահումները՝ ապագայում դրանք բացառելու համար», - ասաց Սարգսյանը։
Երևանում մայիսի 31-ին անցկացվեցին Ավագանու խորհրդի առաջին ընտրությունները։ Խորհուրդը կազմված է լինելու 65 անդամից։
Կենտրոնական ընտրական հանձնաժողովի տվյալների համաձայն, Երևանի ավագանու խորհուրդ են անցել անհրաժեշտ շեմը հաղթահարած երկու կուսակցություն և մեկ քաղաքական դաշինք։
ԿԸՀ-ի որոշմամբ, «Ընտրությունը քոնն է» հասարակական կազմակերպությունը հավատարմագրվել էր Երևանի Ավագանու խորհրդի ընտրություններում՝ դիտորդական առաքելություն իրականացնելու նպատակով։ Քվեարկության օրը կազմակերպությունը դիտորդական առաքելություն էր իրականացնում Երևանի բոլոր 439 ընտրատեղամասերում։
Կենտրոնական ընտրական հանձնաժողովի տվյալների համաձայն, Հայաստանի հանրապետական կուսակցությունը Երևանի Ավագանու խորհրդի ընտրություններում հավաքել է 190171 ձայն (47,39 տոկոս)։ 91141 ձայնով (22,71 տոկոս) երկրորդ տեղում է «Բարգավաճ Հայաստան» կոալիցիոն կուսակցությունը, երրորդ տեղում է 69871 ձայն (17,41 տոկոս) հավաքած ընդդիմադիր Հայ ազգային կոնգրեսը:
Մյուս կուսակցությունները հավաքել են 7 տոկոսից պակաս ձայն՝ այդ կերպ չհաղթահարելով Ավագանու խորհուրդ անցնելու համար անհրաժեշտ շեմը։-0-
