Երևանի Ավագանու խորհրդի ընտրություններն արդար էին. ԿԸՀ քարտուղար

ՀՀ Կենտրոնական ընտրական հանձնաժողովի քարտուղար Աբրամ Բախչագուլյանը նախօրեին անցկացված Երևանի Ավագանու խորհրդի ընտրություններն արդար է համարում։

«Այս ընտրություններն աննախադեպ էին իրենց թափանցիկությամբ, քանի որ տվյալներին ինչպես քվեարկության, այնպես էլ արդյունքների ամփոփման ժամանակ, կարելի է հետևել իրական ժամանակի ռեժիմում», - ասաց Բախչագուլյանը։

Նրա խոսքերով՝ տարածքային ընտրական հանձնաժողովներում տեղադրվել էին պրոեկտորներ, որոնց միջոցով ստացված տվյալներն անմիջապես հայտնվում էին էկրանի վրա, իսկ նախնական տվյալները ԿԸՀ-n ստանում էր ավտոմատացված համակարգի միջոցով։

Խոսելով ընտրությունների ընթացքում խախտումների և թերությունների մասին՝ Բախչագուլյանը նշեց, որ այսօր ժամը 09։00-ից մինչև 14։00-ն ընդունվում են ձայների վերահաշվարկին վերաբերող բողոքներն ու պահանջները։

«Այդ բողոքների քննությունից հետո պարզ կդառնա՝ ազդեցի՞ն արդյոք այդ խախտումներն ու թերությունները ընտրությունների արդյունքների վրա», - նշեց Բախչագուլյանը։

Նրա խոսքերով՝ Կենտրոնական ընտրական հանձնաժողովը ևս թերություններ և խախտումներ է գրանցել, մասնավորապես ՝ Մալաթիա-Սեբաստիա համայնքում։

Բախչագուլյանը նաև նշեց, որ ընտրությունների ընթացքում ընտրողների ակտիվությունը նորմալ էր։

Երևանում մայիսի 31-ին ավարտվեցին Ավագանու խորհրդի առաջին ընտրությունները։ Խորհուրդը կազմված է լինելու 65 անդամից։ Երևանի քաղաքապետի պաշտոնը կզբաղեցնի այն կուսակցության համամասնական ցուցակի առաջին համարը, որը ավագանու խորհրդում կզբացեղնի տեղերի  մեծամասնությունը:

Երևանի Ավագանու խորհրդի ընտրություններն անցկացվում են համամասնական ընտրակարգով:

Էլեկտրոնային տարբերակով ԿԸՀ-ից ստացված նախնական տվյալների համաձայն՝ ձայնի իրավունք ունեցող 771 477 քաղաքացուց ընտրություններին մասնակցել է 407745 մարդ կամ ընտրողների 52,85 տոկոսը։-0-

Կենտրոնական ընտրական հանձնաժողովի նախնական տվյալների համաձայն՝ Երևանի Ավագանու խորհուրդ են անցել անհրաժեշտ շեմը հաղթահարած երկու կուսակցություն և մեկ քաղաքական դաշինք։

Արձանագրության համաձայն՝ Հայաստանի հանրապետական կուսակցությունը Երևանի Ավագանու խորհրդի ընտրություններում հավաքել է 190171 ձայն (47,39 տոկոս)։ 91141 ձայնով (22,71 տոկոս) երկրորդ տեղում է «Բարգավաճ Հայաստան» կոալիցիոն կուսակցությունը, երրորդ տեղում է 69871 ձայն (17,41 տոկոս) հավաքած ընդդիմադիր Հայ ազգային կոնգրեսը:

Մյուս կուսակցությունները հավաքել են 7 տոկոսից պակաս ձայն՝ այդ կերպ չհաղթահարելով Ավագանու խորհուրդ անցնելու համար անհրաժեշտ շեմը։

«Օրինաց երկիր» կուսակցությունը ստացել է 20959 ձայն կամ 5,22 տոկոս, Հայ հեղափոխական դաշնակցությունը ստացել է 18648 ձայն (4,65 տոկոս), Ժողովրդական կուսակցությունը՝ 8569 ձայն (2,14 տոկոս), Հայաստանի աշխատավորական սոցիալիստական կուսակցությունը՝ 1951 ձայն (0,49 տոկոս)։