ՀՀ ՊՆ-ն կոչ է անում զերծ մնալ Ավագանու խորհրդի ընտրություններին զինծառայողների մասնակցության վերաբերյալ շահարկումներից

ՀՀ պաշտպանության նախարարությունը  կոչ է անում զերծ մնալ Երևանի ավագանու խորհրդի ընտրություններին զինծառայողների մասնակցության մասին անտեղի շահարկումներից։

«Որևէ ժամկետային զինծառայող զորամասից չի հանվել և զինծառայողների ցուցակներ չեն կազմվել»,- ասաց Պաշտպանության նախարարի մամուլի քարտուղար Սեյրան Շահսուվարյանը։

Ընդ որում նա նշեց, որ հրահանգը եղել է բոլոր զորամասերի հրամանատարներին չխոչընդոտել զինծառայողների` սպաների, ենթասպաների, պայմանագրային զինծառայողների, իրենց սահմանադրական իրավունքից օգտվելու գործընթացը:
 
«Ինչպես յուրաքանչյուր քաղաքացի, այնպես էլ զինծառայողները պետք է հնարավորություն ունենան օգտվելու իրենց սահմանադրական իրավունքից: Մեր կողմից հրահանգվել է, որպեսզի զորամասերի հրամանատարները հնարավորություն տան ընտրելու ցանկություն ունեցող վերոհիշյալ քաղաքացիներին իրացնել իրենց սահմանադրական իրավունքը, և որևէ կերպ չպարտադրել այն զինծառայողներին, ովքեր չեն ուզում մասնակցել, գնալ ընտրության: Խորհուրդ եմ տալիս զերծ մնալ անտեղի շահարկումներից»,- ասել է Շահսուվարյանը։-0-