ԵՐԵՎԱՆ, 31 մայիսի. /Նովոստի-Արմենիա/. Երևանի Նոր Նորք համայնքում նախընտրական կաշառք բաժանելու մասին ահազանգը չի հաստատվել, միջադեպի առնչությամբ ոչ մի փաստ չի ներկայացվել, ասվում է կիրակի ՀՀ գլխավոր դատախազության կողմից «Նովոստի-Արմենիա» գործակալությանը ներկայացված հաղորդագրության մեջ։
Երևանում մայիսի 31-ին անցկացվում են Ավագանու խորհրդի ընտրություններ, որոնք կկարողանա մասնակցել 771,5 հազար մարդ:
Հայ Ազգային կոնգրեսը մայիսի 31-ին հաղորդագրություն է տարածել, թե ՀԱԿ-ի Նոր Նորքի նախընտրական շտաբի ներկայացուցիչը ականտես է եղել ընտրակաշառքի բաժանմանը, լուսանկարել այն և զանգահարել է ոստիկանություն։ Ոստիկանությունը ժամանել է ՀԱԿ-ի շտաբ, գրանցել խախտումը և անցկացրել հարցաքննություն։
Այս առնչությամբ գլխավոր դատախազությունը հայտնում է, որ նման ահազանգ իրոք ոստիկանությունում ստացվել է, սակայն չի հիմնավորվել, որևէ փաստ ոստիկանությանը չի տրամադրվել և խախտում որպես այդպիսիք չի գրանցվել:
Մասնավորապես՝ 2009 թվականի մայիսի 30-ին՝ ժամը 22-ի սահմաններում, ոստիկանության Նոր Նորքի բաժին ահազանգ է ստացվել, որ Նոր Նորքում գտնվող Առևտրի քոլեջի մոտ հավաքված մարդիկ հնարավոր է ընտրակաշառք են բաժանում:
Անմիջապես դեպքի վայր են մեկնել ոստիկանության Նոր Նորքի աշխատակիցները, որոնք այցելել են Նոր Նորքի 2-րդ զանգվածում գտնվող Առևտրի քոլեջ, որտեղ տեղակայված է թիվ 1/33 ընտրատեղամասը, և այնտեղ ընտրակաշառք բաժանելու փաստ չի հայտնաբերվել:
«Դեպքի կապակցությամբ նյութեր են նախապատրաստվել, որի ընթացքում «Հայ Ազգային Կոնգրես» դաշինքի ավագանու ընտրությունների թեկնածու Հրաչյա Աղաբեկյանը բացատրություն է տվել այն մասին, որ 2009 թվականի մայիսի 30-ին՝ ժամը 20:30-ից մինչև 21:00-ն ընկած ժամանակահատվածում իրեն զանգահարել են անհայտ քաղաքացիներ, որոնք չեն ներկայացել և հայտնել են վերը նշվածի մասին: Միաժամանակ նշել է, որ նշված փաստը իր կողմից չի ստուգվել և ինքը ոստիկանության Նոր Նորքի բաժին է զանգահարել քաղաքացիների ահազանգերի հիման վրա»,- ասվում է գլխավոր դատախազության հայտարարության մեջ:
«Երևանում տեղական ինքնակառավարման մասին» նոր օրենքի համաձայն՝ նախատեսվում է Երևանում ստեղծել 65 անդամից բաղկացած և համամասնական ընտրակարգով ձևավորվող Ավագանու խորհուրդ։ Երևանի քաղաքապետի պաշտոնը կզբաղեցնի այն կուսակցության համամասնական ցուցակի առաջին համարը, որը ընտրությունների ժամանակ կհավաքի ձայների մեծամասնությունը:
Երևանի Ավագանու խորհրդի ընտրություններն անցկացվում են համամասնական ընտրակարգով:
Ընտրություններին մասնակցում են «Բարգավաճ Հայաստան» կուսակցությունը, ՀՀԿ-ն, «Օրինաց Երկիր» կուսակցությունը, ՀՅԴ-ն, Ժողովրդական կուսակցությունը, ՀՀ Աշխատավորական սոցիալիստական կուսակցությունը և ՀԱԿ նախընտրական դաշինքը։ --0--
