Ժամը 11։00-ի դրությամբ Երևանի Ավագանու խորհրդի ընտրություններին քվեարկել է ընտրելու իրավունք ունեցող քաղաքացիների 11,72 տոկոսը, ԿԸՀ-ից տեղեկացրեց ՀՀ Կենտրոնական ընտրական հանձնաժողովի փոխնախագահ Հարություն Շահբազյանը։
«Երևանում ընտրողների ընդհանուր թիվը 771 477 մարդ է: Առավոտյան ժամը 11։00-ի դրությամբ ընտրություններին մասնակցել է 90, 450 ընտրող, ինչը կազմում է ընտրելու իրավունք ունեցող քաղաքացիների 11,72 տոկոսը», - ասաց նա՝ հիմնվելով ընտրական հանձնաժողովներից ստացված՝ ընտրողների ակտիվության մասին առաջին պաշտոնական տվյալների վրա։
Երևանում մայիսի 31-ին անցկացվում են Ավագանու խորհրդի ընտրություններ: «Երևանում տեղական ինքնակառավարման մասին» նոր օրենքի համաձայն՝ նախատեսվում է Երևանում ստեղծել 65 անդամից բաղկացած և համամասնական ընտրակարգով ձևավորվող Ավագանու խորհուրդ։ Երևանի քաղաքապետի պաշտոնը կզբաղեցնի այն կուսակցության համամասնական ցուցակի առաջին համարը, որը ընտրությունների ժամանակ կհավաքի ձայների մեծամասնությունը:
Երևանի Ավագանու խորհրդի ընտրություններն անցկացվում են համամասնական ընտրակարգով:
Ընտրություններին մասնակցում են «Բարգավաճ Հայաստան» կուսակցությունը, ՀՀԿ-ն, «Օրինաց Երկիր» կուսակցությունը, ՀՅԴ-ն, Ժողովրդական կուսակցությունը, ՀՀ Աշխատավորական սոցիալիստական կուսակցությունը և ՀԱԿ նախընտրական դաշինքը։ --0—
